謝安琪：最衰冇得咀自已！

謝安琪昨晚出席香港迪士尼樂園10周年「A Happily Ever After Christmas」盛演，不少藝人都合家歡前來，像陳浩民一家五口、林文龍郭可盈夫婦、陳國邦羅敏莊與女兒、楊婉儀一家、黃家強一家、湯盈盈與大女及任賢齊等均有出席。為配合主題，Kay以動畫《魔雪奇緣》主角Elsa公主打扮現身，又在城堡前唱出樂園全新主題曲《有夢要想－Happily Ever After》，為了此活動Kay悉心打扮：「想配合城堡主題打扮，梳咗個平時少梳嘅髮型。」

帶子同來合家歡

Kay又表示帶了自己和經理人的兒子來玩，囝囝張瞻可有打扮成王子？Kay說：「佢自己揀，依家小朋友有自己主見。（有冇諗住追個女？）冇呢個實質計劃，有小朋友呢樣嘢係天意，順其自然。」最近香港有一民意調查，Kay在其中一題「港男最想接吻對象」中擊敗荷里活女星「妙麗」愛瑪沃森（Emma Watson）及韓國女神全智賢奪冠，Kay聞得即驚訝的說：「個範圍都幾闊，又有外國女星及不同界別，真係好榮幸，最衰冇辦法自己咀自己。」她的老公張繼聰時刻都咀到她最幸福，Kay笑說：「你要問番佢，我就錫個仔多啲。」

謝安琪與卡通人物一起表演。	陳浩民與太太帶三個仔女遊樂園。	黃家強一家三口。

講到調查另一題目是香港情侶婚後減少接吻，Kay即怕醜話問題太私人：「但結咗婚感情係唔同咗，雖然未必有番嗰種激情、浪漫，但係去咗另一個階段，一樣好冧豬。而且佢成日做搞笑嘢，當你成日對住一個人咁搞笑都好抵！」

王宗堯、周家怡、陳詩慧

陳家樂（左起）、衛詩雅、湯怡及麥子樂結伴同行。

浩民太太又佗女

早前宣布老婆懷有第四胎的陳浩民，帶同三個仔女受訪，他說老婆腹中胎兒是女，明年5月是預產期，又笑言現在一屋都是「前世情人」，問到太太產後可會再追一個？陳浩民笑說：「每次都好突然，順其自然，從來冇話生定唔生，太太好鍾意小朋友，自己都鍾意熱鬧。（你少幫太太手先講得輕鬆？）係呀！有時抱吓囉，瀨尿就畀番太太。」

文：音樂組