呂慧儀給18歲蟹籽的信
「長腳蟹」呂慧儀去年榮升「蟹媽」，由咪神變索媽，全心照料家中大小二事。有次「蟹籽」發燒兩日兩夜，愛子心切的她提起時仍猶有餘悸，自爆驚足48小時完全冇瞓過：「我眼都乾埋，但好戥佢辛苦！」她只求蟹籽健康成長，深信孩子不能逼，還寫了一封信「給18歲的蟹籽」，鼓勵蟹籽將來堅強面對困難。
事業女性 繼續性感
港姐出身的呂慧儀可謂無綫咪神始祖，去年她為老公黃文迪誕下「蟹籽」Anton後，寧願減少工作，投放更多心機湊仔，咪神升呢索媽。
我知近年唔少新進女星躋身咪神行列，依家好多後起之秀，後生女當然好有活力，但每個年紀都有屬於自己嘅性感，熟女都有成熟韻味。我會定位自己為女人嘅「中段」，即係青同黃之間，但唔係青黃不接，係接住青同黃，喺呢段時間我都會漫漫醞釀出韻味。雖然依家生咗個仔，但我唔會做全職媽咪，我都想保持事業型女性形象。如果唔做嘢就會同社會脫節，到蟹籽第時長大出嚟做嘢，我驚同佢溝通唔到。
依家我會更加睇場合着衫，唔止係靚行先。不過我又唔驚蟹籽將來睇到媽咪以前咁性感會嚇親，老實講去到佢大個咗個年代，可能佢身邊啲同學仔更性感呢！
囝囝發燒 冇覺好瞓
初入行時呂慧儀被外界認定為花瓶，至今蛻變成內外兼備的索媽，長腳蟹將全副心機投放家庭，更成為緊張大師。
有次蟹籽打完預防針後發燒，燒足兩日兩夜，呢兩日我冇瞓過覺，我好驚呀！我驚如果我瞓着咗，咁啱佢燒得高，但我又瞓着咗。我眼都乾埋，但好戥佢辛苦。正常每兩個鐘要幫佢量度體溫，我就每一個鐘就量度一次。但好彩佢發燒得嚟又好精靈，都有啲反應，最多係碌嚟碌去，成日扭計。有啲BB病得嚟好呆呆濟濟，所以我都冇咁擔心。
我老公最近病咗，佢會自己隔離，驚傳染畀蟹籽。但我病咗就唔會同蟹籽隔離，因為蟹籽每晚都會食人奶，所以我嘅抗體都係佢嘅抗體。我同蟹籽嘅關係好close，我屋企有請家傭，但佢唔係負責湊仔，湊仔我自己做番，食嘅嘢都係由我親手煮，家傭係做後勤工作，執吓屋做吓家務。小朋友返學前嘅階段係好珍貴，我應該要珍惜同佢相處嘅時光。你問我一兩歲時學過乜？我唔會記得，但我淨係記得當時我屋企人點陪住我。
湊仔辛苦過拍戲，但我好想睇蟹籽一步一步長大，有好多moment都係刻骨銘心。有一次，未夠一歲大嘅佢突然識行，健步如飛，嗰一刻好難忘。仲有佢第一次意圖叫「媽」，但佢不斷發「da」、「la」，不斷嘗試，呢一刻好記得，到依家佢已經識得認我係「Mamimi」，爸爸係「Dadydy」。
面對逆境 背後支持
孩子會長大，終有一天離開父母護蔭，長腳蟹會一直在蟹籽背後默默支持，她還寫了一封信「給18歲的蟹籽」。
「很難想像你18歲的時候，社會會有甚麼樣的戀化，但希望你明白，爸爸和媽媽會一直在你的背後支持着你。」她期望蟹籽會堅強面對困難：「工作也許會有不如意，學習也許會有難度，但你必須知道，磨鍊能讓你成長。」最後，信中更以「匆匆數十載得用最快樂的心情去細嘗。」作結，希望蟹籽人生能知足快樂。「很難想像你18歲的時候，社會會有甚麼樣的戀化，但希望你明白，爸爸和媽媽會一直在你的背後支持着你。」她期望蟹籽會堅強面對困難：「工作也許會有不如意，學習也許會有難度，但你必須知道，磨鍊能讓你成長。」最後，信中更以「匆匆數十載得用最快樂的心情去細嘗。」作結，希望蟹籽人生能知足快樂。
怪獸家長 絕對唔做
學童競爭大，不少家長覺得一定要贏在起跑線。今屆港姐麥明詩以輝煌學歷勝出，很多人都想培育下一個麥明詩。呂慧儀則認為孩子逼不來，健康快樂最重要。
好多嘢逼唔嚟，佢又唔想做，我又會躁底，對雙方都唔好。我唔想幫佢鋪好晒條路，但我能力範圍會有適當準備畀佢，畀佢最好嘅嘢。我希望蟹籽喺求學階段，學得幾多得幾多，老套講句「求學不是求分數」，拎到一個好分數係個bonus。麥明詩好高學歷，佢好叻，我好羨慕佢咁有天分讀書，但我唔知套唔套用到蟹籽身上，畢竟出生環境都唔同，我同老公又唔係特別叻嘅父母。
依家好多人上playgroup，但我又覺得未必需要。我化妝師最近生咗個仔，我帶蟹籽去見佢，蟹籽成個人攬住佢。我咁耐都冇見過佢攬住人，呢一刻令我好surprise，原來佢唔使上playgroup都已經識同BB仔相處。二來playgroup入面有好多小朋友，如果其中一個病咗，咁成group人都會一齊病，咁都會擔心蟹籽咁樣染病。
後記：見少一秒都唔得
長腳蟹只能抽出短暫時間接受訪問，皆因她要趕住湊仔，不能見少蟹籽一秒。她笑言電話一定要跟身和有網絡，因為確保能隨時與囝囝視像對話。雖然時間短暫，但她提起蟹籽時雀躍不已，不時會心微笑。言談間，性格豁達的她絕非怪獸家長，不計較蟹籽有沒有高分，只求給予蟹籽擁一個快樂童年。
口述：呂慧儀
筆錄：張敏妍
攝：司徒國榮
服裝：mi-tu & MAGinshop.com
場地：L' Tea Room