阿倫畀伍姑娘情挑三嫂爭「上床」
年屆65歲的藝人譚詠麟（阿倫）可謂魅力沒法擋，既與戚美珍（三嫂）演夫妻，又要被伍詠薇（伍姑娘）情挑，兩位人妻更出盡口術爭住與阿倫親熱，伍姑娘更預告二人有場按摩池情挑戲份，屆時服飾會比三點式還要少，阿倫則笑指未有為此向太太備案！
譚詠麟、戚美珍、伍詠薇等昨日出席電影《江湖喜劇》開鏡，片中感情世界相當豐富的阿倫，透露與三嫂多年來僅合作過一首MV，連親吻鏡頭也沒有，惟今次演夫妻，笑言感覺似背住其丈夫苗僑偉做了不該做的事，三嫂則笑指高興與偶像阿倫合作，更正爭取床上戲及穿三點式戲份：「本來我話親熱戲、床上戲、三點式都OK，點知導演畀晒伍姑娘，唔尊重我囉！（會唔會係三哥唔畀？）暗地裏唔知，三哥反對都還可以，但阿倫反對我會嬲囉！」
唔同老婆備案
而阿倫被問到與兩女有感情戲，事前可有向太太申請？他謂：「嘩！使唔使呀？唔需要啦，做嘢啫！我參加T-back王大賽。（操股肌？）會o架嘞！都係條橡筋繩褲。（紮住佢驚衝動？）仲衝到就好嘞！」曾被指票房不佳的他，可有擔心該片上映票房？阿倫笑謂：「係都老闆擔心，我收咗錢。」談到日前中了3T彩池，阿倫表示連帶安慰獎合共4萬多，10多名朋友每人分4千港幣。
代袁詠儀送吻
與阿倫事隔近20年再合作電影的伍姑娘，就笑指已向導演申請一場於按摩池內、並穿比三點式還少布的造型情挑對方，在旁的阿倫聞言詢問是否穿T-back？有急才的伍姑娘即謂：「你定我？我唔介意反轉嚟着！我已經唔記得自己有冇老公。」阿倫惟有打圓場謂：「橡筋繩褲OK！」及後伍姑娘作狀咀阿倫，更表示其中一咀代表阿倫的粉絲袁詠儀。
事後伍姑娘受訪時謂：「20年前合作做夫婦，喺我最魔鬼時佢哋冇畀（情挑戲）我，到依家熟少少將校長交畀我，timing好好。（少過三點式即係唔着？）着o架！只不過我把口衰，講到好鹹濕，其實唔止一場情挑，仲有一場關蛋撻事，圍讀時眼淚已經係咁流，笑到好慘，相信場戲要NG五十次以上。」
文：影視組