惠英紅一姐上身兇後輩

影后惠英紅在電影《上身》中與新人陳穎欣（Yanny）演母女，為配合電影劇情需要，惠英紅不惜做「衰人」在片場鬧爆對方，她說：「相信開工初期Yanny好憎我，因為我想佢快啲投入角色，開拍前我對佢好惡，仲突然走去鬧佢。其實係希望佢真係驚咗我，我知用最真實方法做衰人去鬧佢係最有效，結果效果真係好好。佢演戲真係好快上手，其實合作過好多新人，佢哋會困死咗好生硬咁去演，唔畀對手帶住走，但Yanny好快上手又跟得好自然。」

用心良苦先鬧後教

Yanny坦承初期感到很大壓力，首次與惠英紅合作已感覺到紅姐的「戲場」：「紅組真係好犀利，片場見到佢已經感覺到大家有一種距離感，不過因為佢做我媽媽，片場內我會成日偷望佢，又借機坐近佢，拉近做母女關係嗰種感覺。其實紅姐幫咗我好多，因為事前我已寫低晒要點做，但反而冇辦法做得自然，變咗做戲唔係演戲，係紅姐教我點樣跟住佢去演，令我放鬆好多，演得自然流暢。」

隱瞞一家五口命案

由於電影在泰國取景拍攝，更以懸疑為主題，故拍攝時增添不少恐怖氣氛。拍攝完畢惠英紅和Yanny才驚覺拍攝那間屋曾發生一家五口命案，惠英紅說：「拍完返香港先知，原來我成日休息瞓覺間房死咗三個人。唔怪得成日瞓瞓吓有工作人員叫醒我，原來係擔心我有事。都唔知嬲唔嬲導演好，如果事前講我仲驚。」Yanny則表示難怪拍攝時場景分外陰森恐怖，事後才知發生過一家五口命案，幸好冇怪事發生。

文：影視組

惠英紅化妝：小白

髮型：James

陳穎欣化妝：Kin Yip @ Kings Make Up

髮型：Calvin Tsoi@HAiR

服裝：Rocket Lunch @ i.t

場地：Hotel Icon