林奕匡預告浪漫求婚呼籲幫手
娛樂圈靠旁門左道上位的人比比皆是，循規蹈矩的林奕匡（Phil）雖然較為吃虧，但仍選擇忠於自己的作風，努力向紅館夢進發！而Phil早已認定相戀8年的女友，喜歡浪漫的他計劃以戲劇化方式求婚，更叫大家若有idea可以message他！
走過低谷的歌手林奕匡即將推出新碟《有人共鳴》，當中一首偏黑暗的歌《安徒生的錯》由Phil作曲，藍奕邦填詞，內容講述安徒生的故事中通常好人會有好報，但現實生活不少人靠走後門去令自己成功，Phil卻說：「我個人比較正規，唔鍾意行捷徑，可能會蝕底，但我相信會搵到自己嘅出路同快樂！」
望紅館開騷
他亦坦言入行以來遇過很多社會的殘酷現實，然而樂觀的他會將負能量轉化做正能量，提醒自己已捱過最低谷的日子：「諗番轉頭以前成日望天打卦，依家更辛苦都好，起碼我做緊自己鍾意嘅嘢！」每位歌手對「成功」的定義不同，Phil認為在紅館開演唱會絕對是一個好指標：「男歌手獎或者唱片獎呢啲好難得到，我都一定會aim for，但為嗰件事去做就一定做唔到，好似《高山低谷》咁，當初做呢首歌嘅時候係想畀人認識我，就係咁簡單！」
呵護另一半
今年三十歲的Phil已到適婚年齡，並有拍拖8年、關係穩定的圈外女友，對於婚姻大事，他說：「有諗過，但結婚前要求婚，我偏向鍾意浪漫，而佢都鍾意dramatic啲，始終一生人一次，所以要多啲時間去諗，如果大家有好嘅idea都可以message我！」雖然「男人不該讓女人流淚」，但他亦希望將來能令女友流出開心的眼淚：「佢依家比以前冇咁擔心我，不過佢睇到我喺台上表演、攞獎仲係緊張多過開心，希望一日佢都唔需要再擔心我！」
文：音樂組
攝：吳文聰