盧頌之醉駕判停牌一年

（口靚）模盧頌之今年7月25日駕車載着電台DJ陳達仁及友人途經青山公路青龍頭迴旋處時發生交通意外，由於車毀人傷及DaDa涉嫌醉駕即場被捕。昨早她在兩名友人陪同下到荃灣裁判法院出席聆訊。DaDa在庭上承認控罪並表示已知犯錯，望法官給予機會，最後她被判社會服務令120小時、罰款3000元及停牌一年，並須於停牌完結前三個月內自費完成強制修習駕駛改進課程。

DaDa步出法院時被問到對裁決是否滿意？她說：「多謝大家關心，知道自己做錯，希望可以貢獻社會。」問到男友趙勁皓為何沒陪同？她說：「佢有嘢做，身邊所有人都好關心我。」而其後趙勁皓昨日透過WhatsApp表示：「好幸運，判得好輕，佢亦得到教訓，希望知錯，唔好再犯。」

「比想像中判得輕」

因車禍撞到右上臂骨折入院的陳達仁，更賠上胞弟辣跑，因為DaDa肇事的跑車登記車主為達仁的胞弟，達仁昨午在判決後更在facebook留言寸爆：「吓！我有冇聽錯？以後可以放心醉駕！」似乎對判決有意見，截稿前DaDa未有回覆。

昨日陳達仁在電話受訪大呻運滯，原來車禍事件後，他自稱疑遭「老千」騙取其娛樂公司及泰國結婚之旅的金錢，合共損失逾150萬元，連電台工作都保不住，他大嘆：「本來被『老千』呃錢件事蓋過我對DaDa怨恨，我都好想大方、有型講一句過咗去，由得佢，但知道判決後有啲唔舒服，比我想像中判得輕咗，判佢120小時社會服務令，不如叫佢幫我祈福120小時，我唔係一定要重刑，但係咪我死咗就重啲？如果我終身殘廢？我係有啲嬲，點解好似懲罰嚟咗我度，法例冇判我，個天懲罰我！」

怨賠償不了了之

陳達仁認為自己所受的懲罰比DaDa大好多：「我仲要供緊架廢鐵（指已報廢的肇事跑車），隻手依然會痛，揸車都要用手托住，攞唔到重嘢，連開車門都唔得。」他曾表示不會向DaDa追究賠償，問他可有再聯絡對方？他說：「聯乜鬼，人哋見到我都驚，追乜鬼，人哋男朋友大聲話會負責賠償，但冇人聯絡過我，唔通想我去做乞兒追？索乜鬼，如果循民事索償，我連律師費都嘥晒，不如畀心機做嘢搵錢好過。」當日DaDa炒車撞毀防撞欄及一條電燈柱，車主及司機有機會被索償，他說：「聽天由命啦，唯一可以做嘅，叫細佬試吓向保險索償。」

文：音樂組　

攝：張福宏

案件編號：TWCC2922/2015