陳凱琳避佘「穎女郎」零交流

2016無綫節目巡禮昨晚在將軍澳電視城舉行，公布來年重點節目，百多位藝員盛裝出席盛會，吸引約一千名廣告客戶到場，場面熱鬧！

全場最受注視是鄭嘉穎現任女友陳凱琳（Grace）及舊愛佘詩曼同場，幸好嘉穎未有到場，避過尷尬時刻！眾星合照時，阿佘與Grace雖同樣企在第一行，但遭數位藝員隔開，其後兩女即使近距離行過亦互當透明，連招呼都費事打！而Grace與Bob（林盛斌）及張繼聰擔任司儀，訪問阿佘期間，Grace顯得相當避忌，幾條問題都交由Bob及阿聰發問，以免跟阿佘直接對話，同台玩遊戲時，兩女又未有出聲，只得Bob及阿聰講個不停。

將來合作冇尷尬

Grace受訪時死撐與阿佘見面冇尷尬，表示各有各忙未有時間傾偈：「冇尷尬，就算將來合作都冇問題。（你好似接唔到Bob同阿聰啲Gag？）佢兩個負責搞笑，我負責啲稿，我特別克制自己，唔好笑太多添！」台上宣布阿佘將參演重頭劇《使徒行者2》，海報上印有阿佘、苗僑偉、許紹雄、江美儀及陳敏之肖像，上集主角林峯冇份，另外阿佘將參與《愛情來的時候2》，阿佘表示上集是她欺負馬國明，今次則被對方整喊，馬國明即賣口乖讚阿佘喊樣一樣省鏡！

阿佘透露將參與《愛情來的時候2》。	身為媽媽級的呂慧儀笑言要吸引廣告客戶，努力賺奶粉錢。	擔任司儀的陳凱琳（左二）未有與佘詩曼對話，由Bob（左）負責發問問題。

昨晚舉行的紅地氈冒雨進行，有藝員擔遮出場，亦有人冒雨粉行紅地氈，但無阻眾花旦爭妍鬥麗鬥騷身材，呂慧儀、陳煒及楊秀惠夾出超強事業線冧客戶，烏身派禮物時更令人窒息！沈卓盈、王君馨、陳庭欣、黃心穎及岑麗香均Deep V示人，至於「咪神」高海寧雖亦是低胸，但效果較失色。

谷胸上陣的苟芸慧久未出席無綫的大型活動，表示既緊張又興奮。	楊怡晒靚背在眾女星中突圍。	眾星合照時，與陳凱琳同在第一排的佘詩曼低下頭，未有與對方打招呼。

呂慧儀谷胸抓銀

人母呂慧儀對於被讚最「胸狠」，她笑說：「唔係啩？好多靚女喎！我係適當性感，老公都話ok，希望廣告客戶留意到我，畀我賺吓奶粉錢。」久未出席無綫大騷的苟芸慧身穿紅色谷胸晚裝，她直言心情既興奮又緊張，問到何時再拍劇？她說：「我會做綜藝多啲，我興趣係賽車，公司都畀我發展。（身形瘦咗！）真係？好開心！多謝！（被影到去美容現積極減肥？）唔係真嘅嘢唔回應喇！」

另外，大合照向來是地位指標，今年企第一行中間的除了前輩汪明荃及陳百祥外，最靚位是阿佘、陳豪、鍾嘉欣、黃宗澤、郭晉安、田蕊妮、黎耀祥及楊怡。而全場最受廣告客戶歡迎藝人要數陳豪及胡定欣，不停被包圍索合照。

文：影視組