劉思希擺脫乖乖女 想做辣妹
身高一米七的劉思希（Liza）趁在天氣轉冷之前，換上泳衣留下美麗印記，盡展33C fit爆身材。一向形象乖乖女的Liza原來最想挑戰辣妹、壞女孩角色：「做吓飛女都幾好，現實冇機會曳，想大膽少少做吓另一個自己。」而她試過最曳是讀書時出貓。
想演打女的她有嘗試打泰拳：「但當我買齊晒成set嘢之後就冇再去玩過。（咁嘥？）係呀，我都覺得好嘥，買完之後就撞咗另一個job，冇上幾堂就懶番。」
有品酒師證書
雖然Lisa放棄打泰拳，但她自認頗有毅力，又虛心學習：「我有學品酒，依家拎咗個三級品酒師證書，可以寫吓酒評。（上堂會飲到醉晒？）醉住咁放學返屋企！（會唔會要求未來男友都要有相同品味？）我教佢品酒咪得囉！（佢要識啲咩？）我希望佢大量，要包容到我好多嘢。因為有時我好臭脾氣、大把嘢畀佢受呢！不過我平時脾氣好好嘅，掟嘢都係掟人哋啲嘢。」
文：影視組