李彩華精神分裂 袋3,300萬

李彩華一邊做霸氣土匪（上圖），另一邊則扮演大家閨秀，笑言「精神分裂」！

31歲的李彩華早前憑內地劇《回家的誘惑》再度爆紅，據知身價暴漲至每集30萬人民幣（約37萬港元），不過仍有不少製作單位主動接洽要求合作，令Rain一劇接一劇，勁賺人仔，除之前拍完30集《獨立縱隊2》，年尾前還要拍各30集的《家國恩仇記》及《天下正道》，今年拍了三劇的Rain進帳約2,700萬人仔（約3,300萬港元），認真和味。

熬五粒鐘車趕劇

不過，Rain卻有苦自己知，因《家》劇在浙江拍，《天》劇則在橫店：「兩套劇都趕拍，時間緊迫，我唔想影響劇組進度，情願自己辛苦啲，喺浙江拍完即刻趕去橫店，來回要五個鐘頭車程。但最辛苦唔係熬車，係兩套劇嘅角色反差好大，《家》劇我做土匪，要粗豪、開槍，有好多體力勞動戲，拍我喺泥漿裏面監視敵人，啲泥漿又凍又難行，好辛苦。《天》劇我就扮演大家閨秀，要斯文、有禮，真係搞到我有少少精神分裂！惟有喺車程中調息自己。」

李彩華扮演大家閨秀。	今年在內地拍三套劇集，李彩華進帳三千幾萬，和味！	李彩華拍劇時死撐，其實拍到五勞七傷。

捱至「五勞七傷」

雖然收入豐厚，但醫療開支卻不為人知，Rain說：「長期喺內地工作，穿州過省，內地嘅天氣變化好大，時凍時熱，好多時傷風感冒，長期都要睇醫生。每次返香港都要搵醫生『大修』全身檢查，拍動作場面搞到自己五勞七傷，要花唔少錢買中藥調理，長期黐住個藥煲做人。」她更不想令媽咪擔心。文：影視組