楊秀惠：我好鍾意呢份工！

呼籲男士出擊

踏入三十有一「中女」階段，女人趕住嫁出去、趕住生育下一代的思想似乎是守舊、老土，但同時都是人之常情，外表光鮮亮麗的無綫小花楊秀惠，看似不愁寂寞，但單身已久的她卻坦白恨嫁的心，只想做個老公背後的小女人！

「每個女仔到某個年紀都想有個啱嘅人出現，想畀人保護，我覺得畀人好好愛錫嘅女仔特別靚！身邊好多朋友成家立室，但自己真係唔敢去定target，好驚講咗想幾多歲幾多歲結婚，到時實現唔到會好唔開心好失望，所以都係順其自然啦，如果可以快啲出現當然更好啦！」

想畀人保護

「又冇話特登去尋覓，我驚會嚇親啲男士，應該矜持啲，太主動冇咁好，都係繼續默默地等待真愛出現啦！又唔驚日日喺度等待會錯失咗機會嘅，因為我今日喺個訪問度咁講出嚟，男士們要識得主動出擊啦！」

楊秀惠雖入行多年，亦不介意現時才開始獲觀眾注意。	愛扮靚的楊秀惠指任《姊妹淘》主持好享受。	曾與Ray拍拖多年的楊秀惠，於談婚論嫁時卻撻Q。

為事業冇時間

熱愛工作的楊秀惠，直言常為事業而放棄識朋友機會，自認大頭蝦的她，亦希望搵個細心的男友，可以時時提醒自己幾時係咩節日同紀念日！

楊秀惠於《天眼》突破做打女。	憑發姣放電「Lolita」一角出位的楊秀惠，連番出招引陳豪，相當爆笑。	正等待真愛的楊秀惠，呼籲男士們要主動出擊！

「都單身咗一段時間，又唔覺得係因為要求太高，主要都係工作太忙，一路拍劇、主持《姊妹淘》、打理生意，都錯失咗好多出去認識新朋友嘅聚會。真係有時間都會飛返去馬拉陪屋企人，所以都有問過自己係咪應該放慢腳步，但都係唔得，因為真係太熱愛自己嘅工作！」

男仔頭性格

「平時我有啲男仔頭性格，但都會有小鳥依人嘅一面，只不過比較少人見到囉！有時都會嘗試溫柔啲，身邊啲朋友即刻問我係咪唔舒服。平時做嘢都冇乜時間去煮嘢食畀自己，如果識到個『煮家男』識得照顧飲食就一定會加分！」

「我都幾大頭蝦，好多嘢都冇乜所謂啦、快啲啦冇時間喇！所以男朋友都要夠細心，而且以前拍拖我都唔知有啲咩節日同紀念日，要就嚟去到嗰啲節日，身邊啲朋友開始講我先知，真係應該要放喺Timetable上面提自己！」

私底下好隨性

楊秀惠早前在熱爆劇集《鬼同你OT》中飾演「Lolita」，經常以非常性感的形象示人，fit到漏的身材及長腿就連女士們都被她迷倒！問到有何keep fit秘方，她開心share之餘都多謝監製及負責服裝的工作人員。

「多謝大家咁睇得起我！我會用自己公司product按摩，而且亦因為監製對個角色要求好高，畀好多意見同埋畀好大信心我，服裝姐姐佢哋又幫我搵好多適合我嘅靚衫去show到身形最完美。飲食、運動亦一樣要注重，真係唔可以食太多零食，同埋做多啲腳部運動。」

少着高跟鞋

「呢個角色需要打扮得好靚，但平時我本身就好causal，鍾意啲鬆身衫着上身好舒服，唔使點配襯笠上去就啱晒我，而且私底下亦唔會點着高跟鞋，太辛苦喇！」

興奮被人認出

入行多年，楊秀惠直言今年有突破，亦未會太遲，反而好開心在街上有不少人認出，期待與不同演員擦出更多火花！

「上次拍《天眼》做打女，今次做索女，真係好大分別！但我乜都好想去玩去試吓，even要我做番同一個角色，但以另一種表達方法去做都係好考驗演技嘅！做完『Lolita』一角，人氣係明顯變高，雖然入行都一段時間，但我唔覺得係遲咗。反而依家好開心，喺街度有人叫我秀惠同蜘蛛精，好似識咗好多人！我覺得自己整體發展都ok，最緊要大家睇得開心，自己做多啲得意又好玩嘅角色就得。」

「公司太多好嘅演員同埋幕後工作人員我都未合作過，仲會有更多火花可以擦到出嚟，不過亦唔介意同啲合作過嘅人再合作，又會有另一種感覺！就好似之後亦會再同阿mo拍《潮流教主》，之前亦同佢加埋關禮傑合作過《金枝慾孽》，雖然係同一班人，但每次劇本都唔同，效果唔同，好期待一齊創作新嘅作品畀觀眾！」

後記

「我好鍾意呢份工！」每次拍嘢都唔覺得辛苦，反而成班同事嘻嘻哈哈學吓新嘢好開心，拍《姊妹淘》又同班女仔一齊玩就過咗一日，所以我好享受！而美容生意嗰邊，亦有同事好幫得手，佢哋知道我忙拍嘢忙宣傳，將所有嘢都打理得好好，仲睇我啲劇畀comment我、鼓勵我，有時仲幫我cap低啲圖添！

筆錄：陳丹　

攝：劉斌　

場地：Pizza Express@中環威靈頓街　

服裝：112 mountainyam　

髮型：Tim Chong@LA BIOSTHETIQUE