顏子菲索巫恨做貓女俠

曾於加拿大留學的顏子菲性格貪玩又為食，適逢萬聖節，當然不會放過扮鬼扮馬、食大餐的機會。日前，子菲提早到餐廳品嘗萬聖節美食，看見南瓜炒飯、萬聖布丁及黑醋雞花等，也不禁食指大動兼讚好味道！談到以往於加拿大過萬聖節，她表示曾與好友揸一小時車，遠赴當地農場摘大南瓜，再搬返屋企親手雕花，又笑稱準備給小朋友的糖，每次都被她偷偷吃光。

被嘲阿凡達

一向樣靚身材正的子菲又自爆，曾遭陳啟泰嘲笑是「亞視阿凡達」，她沒好氣地笑道：「佢話我又高又瘦，頸又長、腰又長，仲唔係阿凡達？搞到我又嬲又好笑。」幸好，神戲班導師黃秋生和甄詠蓓（Olivia）為她平反，證明她天生麗質，子菲說：「有次秋生要我哋扮鬼扮馬，佢哋搵極都冇個角色啱我，即使我戴上好誇張嘅眼鏡、假髮，Olivia都話『點解你點整都靚o架，點搞呀！』聽到我心入面都有啲暗爽，哈哈！」結果，她獲安排穿高踭鞋扮格格，被攙扶出場的她入型入格。

顏子菲品嘗滿桌萬聖節大餐。

顏子菲於加拿大過萬聖節，最愛用大南瓜雕花。

怕着貼身衫

問到最想扮甚麼角色？由30A成功「升胸」至33C的子菲，直言恨操弗身形扮貓女俠（Catwoman），她雀躍地說：「我好鍾意貓女俠，安妮希芙威（Anne Hathaway）喺《蝙蝠俠－夜神起義》（The Dark Knight Rises）扮過，好性感，我每年都得個『諗』字未試過，因為我覺得要Carry到件皮衣，身形要非常好，佢都瘦好多磅先以最Top狀態拍，希望自己有日弗到Carry到呢個角色，暫時都好驚着太貼身嘅衫，因為會顯露晒身體嘅線條，可能多少少肉都會唧出嚟。」

攝：張福宏　　　

場地：唐宮小聚

髮型：Van Chan BruneBlonde

服裝 : Benita Fashion

文：影視組