陳豪漏夜驗孕茵媺3年抱3
陳豪與陳茵媺（Aimee）雖然結婚僅僅兩年已育有兩個寶貝仔，但原來「陳氏工廠」一直未有停工，上月初本報發現陳豪於深夜時分滿面鬚根衝入超市買驗孕棒，成事後極速閃人，大抵沒想過買棒過程被直擊，故陳豪被追問時即刻面紅，又尷尬又扯衫，封口不談懷有第三胎事宜，不過紙包唔住火，昨日Aimee出席公開活動時已腹部隆起，終宣布現時懷孕三個半月，更指生完第三個後會暫時收工，繼續追尋演藝夢！
陳豪與陳茵媺（Aimee）這對圈中模範夫婦，於2013年結婚後已火速造人，兩年間已分別誕下大仔梓燁（1歲10個月）及次子浩鋒（8個月），一直盛傳二人想追番個女，故即使誕下次子後也未有停工，雖然陳豪已年屆44歲，但仍然有心有力，本報於上月初深夜時分，就發現陳豪現身大埔某24小時經營的超級市場，戴住帽的他一臉殘樣及滿面鬚根匆忙地找來職員，並謂：「有冇驗孕棒？」惟該超市並沒有他想買的牌子，最後陳豪便於職員介紹下，購下別牌子、價值港幣59.9的驗孕棒，大抵陳豪怕被人發現，故付款後便火速離開。
不過陳豪並不知道買驗孕棒時被全程直擊，日前本報向正在電視城為新劇《完美叛侶》開工的他求證時，他當堂面紅，一臉尷尬的他不斷扯衫，顯得不知所措，問到是否買驗孕棒，陳豪謂：「冇啲咁嘅事，（咁係咪追第三個？）唔講嘞！」更以手作封嘴狀。
拒放棄演藝事業
惟昨日谷起心形胸的Aimee出席首飾品牌活動時，終忍不住分享喜悅！穿上Tube Dress長裙的她盡騷三吋「事業線」，與身上過億鑽飾同樣搶鏡，並大方透露已懷有第三胎三個半月，不過還未知今胎性別：「仔女冇所謂，最緊要健康，屋企已經有兩個小王子，加埋有4個王子都冇所謂。老公係三兄弟，我哋預感都可能都係仔。」
已從馬來西亞完成電影拍攝的她，表示早前與老公到蘇梅島旅行，問到BB是否於當地製造？Aimee笑謂：「唔知，唔確定，返嚟先知有咗。（佗BB攰嗎？）攰，大住肚要照顧兩個小朋友，但自己鍾意落手落腳湊仔。（會唔會再生？）三個真係夠晒數，計劃都係生三個，四個就唔好喇，太攰，將來都想繼續拍戲。（第三胎係咪計劃之內？）係，我哋都想小朋友年紀接近啲。（大仔知道未？）大仔聽到睩大對眼，指住我個肚，好驚喜。」雖然Aimee已腹部隆起，但仍貪靚穿上五吋高踭鞋。
計劃之內夠晒數
而陳豪昨日則於電視城為《完》開工，對於Aimee揚言生完三個小朋友後要暫時休息，陳豪也贊同謂：「都夠，3個小朋友對屋企嘅任務都差唔多，遲啲先再諗，媽咪都要抖下。（Aimee話唔肯定BB係咪蘇梅島製造！）件事好natural，上天賜畀我哋，確實幾時就真係唔知，又唔係話要3年生3個，只係計劃生3個，有仔有女就好完美，不過淨係仔都冇所謂。」
文：影視組