琦琦：佢去邊都捧場
為Lanvin效力14年的品牌創意總監Alber Elbaz，自加入以來成功令品牌重生，但前日突然宣布離開品牌，他發表聲明表示離去是大股東的決定，又暗示自己對品牌發展路線的期許與品牌老闆王效蘭意見不一致。消息一出，時裝界已紛紛猜測其去向，大有機會接任剛於上周四宣布離開Dior的Raf Simons的位置。
名模琦琦獲悉事件後感到晴天霹靂，她說跟對方相識多年，十年前琦琦在上海出書，對方還專程捧場，她大讚Alber有才華，老公任達華與女兒也是粉絲：「由佢第一個系列買到依家，有啲牌子衫着完會送畀人，佢啲衫係唔捨得送走，好似art pieces咁，一直收藏，個女就好鍾意佢嘅瓷器公仔，差不多全部有齊。如果佢過Dior，就可以一次過滿足晒大家嘅願望。無論佢去邊，我都一定會捧場。」
陳栢熹唔開心就走
Moiselle太子爺陳栢熹同樣大讚Alber有才華，Lanvin有今日的成就，他功不可沒，但就不覺得可惜：「如果做得唔開心，品牌方向跟自己嘅風格不再一樣，都係時候走，人生總有新嘅一頁，轉吓環境都係好事。」名樣模陳嘉容則說：「係超級十萬個可惜，我記得2000年第一次去巴黎行時裝騷就係為佢行呢個品牌，佢對model好好，知道我哋着咗好耐高踭鞋，就問我哋攰唔攰，要唔要飲啲水，好體貼。」
