衛詩雅起導演底收風定驚
藝人衛詩雅（Michelle）首次跟「夢幻班底」合作拍新戲，壓力雖大，但每日工作都充滿期待，開拍前更周圍收風，望起導演底定驚！正與圈外男友蜜運中的她仍未打算結婚，反而有個創業夢，誓要做次老闆。
現年三十歲的藝人衛詩雅（Michelle）不論在工作或愛情方面亦漸上軌道，電影一部接一部的Michelle同時涉足電視劇，她直言兩者相比，更喜歡拍電影的節奏：「我個人就比較鍾意電影嘅，因為拍劇好快，但我就係鍾意慢慢感受個角色，我淨係拍一場戲都會諗好耐，電視劇就要一嚟就入到角色，之後又好快拍下一場，節奏快好多。」
迎戰夢幻班底
現時忙於開拍新戲的Michelle興奮稱是次團隊是「夢幻班底」，更自爆開拍前曾四圍「收風」，起導演底：「導演同對手都係我一直夢寐以求想合作嘅人，我一知道可以同佢拍對手戲真係好開心好期待，導演亦係我一直想合作，真係好圓滿！每次開工都係一個新嘅挑戰同驚喜，不過同時間壓力都大咗，尤其係未開拍之前，我仲周圍問人打探個導演要求、性格、做嘢方式係點，但拍咗第一個鏡頭之後就定番啲冇咁驚。」
恨開舖做老闆
談及戀事，Michelle即以甜笑回應，問到圈外男友會否因不熟娛圈而「詐型」？Michelle坦言：「初初會理解唔到，但佢係一個好聰明嘅人，好快就知道大概個生活，都好諒解。而且我哋又唔係地下情，平時出街都好似普通人咁。（工作衣着或角色會問男友意見？）我哋好少牽涉對方工作嘅嘢，除非係有咩大事發生，佢係一個好好嘅聆聽者，而且可以教到我點做。」
Michelle對感情事一向低調，惟今次大方認愛，問她是否認定男友為「Mr.Right」？她即解釋：「一路以嚟我都冇刻意低調，人哋問到我就承認，又冇諗咁多喎。（有結婚打算？）未諗到咁長遠，呢兩年都想專注番喺電影方面先，但就想做吓老闆，要認真計劃吓！」
文：鄧倩兒
攝：嚴偉國
場地：What Cheer Studio