賴慰玲拍劇喜遇演藝舊生
演舞台劇出身的賴慰玲（Winki）去年在無綫劇 《女人俱樂部》中飾演「少女張慧儀」，演技獲讚，之後參與重頭劇《梟雄》，飾演黃秋生少年版馬國明的胞妹，雖演出集數不算多，但發揮甚大而且角色關鍵。
Winki表示曾跟秋生學戲，知道能飾演對方的胞妹非常興奮，豈料原來沒有對手戲！她說：「不過能夠同佢喺同一套劇出現都好開心啦！今次有好多難忘回憶，例如第一次出埠拍戲，片場嘅建築好宏偉，同真實上海好似，算係大開眼界！另外，原來劇中有好多演藝學院舊生，例如秋生、蘇玉華、何遠東等，學校冇遇到反而拍劇撞番，感覺幾有趣。」