洪永城衰多口認錯擺和頭酒
藝人洪永城日前的一句「我對佢（黃翠如）付出咗無限咁多嘅愛，好可惜佢最後揀咗Edwin」惹來網民極大回響，出現潮文之餘，翠如的千字回應文更令二人關係匪夷所思。洪永城終在昨日首度回應認失言，打算擺「和頭酒」認錯。
洪永城（Tony）日前活動上的一句「我對佢（黃翠如）付出咗無限咁多嘅愛，好可惜佢最後揀咗Edwin（蕭正楠）」成為網絡熱話，更有網民寫潮文歌頌二人「戀情」，及後翠如更以「每個人心裡面都有對黃翠如同洪永城」為題貼文，實令Tony、翠如、Edwin以及唐詩詠四人關係匪夷所思，Tony昨日終於在將軍澳電視城拍攝無綫新劇《味想天開》時首度公開回應，為自己失言認錯：「我真係好多口，我亂講嘢o架咋，just a joke！」
向蕭正楠道歉
Tony剖白對翠如並無經歷過任何「情侶關係」：「係好好嘅旅遊（節目）拍檔，依家蕭正楠同佢係愛情partner，我都趁呢個機會講聲唔好意思，傷害到其他人真係唔好意思，（傷害唐詩詠？）真係唔係咁好，知道係亂講惹嘅禍，亦趁呢個機會祝福翠如同蕭正楠，佢兩個好夾、好襯。」最後Tony有意擺「和頭酒」向翠如、正楠道歉：「我都希望可以了結件事，佢有佢同蕭正楠，我有我同另一半（詩詠）。」
要氹番唐詩詠
黃翠如接受電話訪問時被問到洪永城認衰兼打算擺和頭酒時，翠如謂：「總之依家係錫唐詩詠多過洪永城好多嘅，叫佢好好哋氹番唐詩詠，如果唔係佢小命不保。」至於身在澳門拍攝《巨輪Ⅱ》的蕭正楠亦大方笑謂：「擺乜嘢和頭酒呀！根本就冇事，叫佢快啲擺喜酒請我飲好過啦！」
文：影視組