莊思敏標旗立異張建聲鬼咁丑

莊思敏（右）化恐怖血痕妝，她笑妹妹莊思明卻扮靚現身。

藝人莊思敏、沈震軒、鮑起靜、羅蘭、邵音音及張建聲等前晚出席電影《碟仙碟仙》首映，眾星配合大會萬聖節主題紛紛變裝，最誇張要數張建聲扮演荷里活片《蝙蝠俠》中的小丑造型，戴上綠色假髮，搽白塊面加超大紅唇，打扮極為煞食！莊思敏則以旗袍女鬼look亮相，臉上還有多道血痕。

嫌妹妹唔夠驚嚇

張建聲透露為撐莊思敏，花了逾六小時化妝，連飯也沒有吃：「頭先坐的士望向車窗，街度有外籍小朋友見我咁樣即時大嗌！不過我近排肥咗少少，啲衫有啲窄。（你之前話健身操肌？）我拍套戲，為咗連戲唔可以一下子瘦晒，戲入面同陳觀泰等前輩合作，我學到好多嘢。」莊思敏大讚張建聲好兄弟，對於妹妹莊思明以黑色鬼魅造型谷胸亮相，莊思敏笑說：「佢扮鬼咩？佢扮靚之嘛！」思明解釋：「呢個look驚o架！頭先行商場幾多人眼望望我！」問到做女主角會否對票房感壓力？莊思敏說：「壓力一定有，但套戲之前喺新加坡、馬來西亞反應幾好，都諗緊上唔上到內地。（鬼片點上？）拍嘅時候係預咗上唔到，但有發行人睇過，想喺內地上，但內容就要做啲調節。」

張建聲以小丑造型現身撐好友場，誠意十足！	沈震軒	放大圖片

另外，羅蘭被問到同樣是資深演員的夏萍跌倒入院，她說：「都係朋友講我先知，佢冇乜嘢吖嘛？（跌親尾龍骨。）年紀大跌親手腳、腰骨就好麻煩。（佢跌倒十個鐘先被發現？）佢有冇裝平安鐘？我屋企有，亦都有工人照顧，年紀大要自己小心，放隻腳落地試試力先。」

文：影視組