郭富城登5恨做老襯

昨日是郭富城牛一，前晚經理人小美花心思為他炮製「25+25」驚喜生日派對，賀他「登五」兼順道慶祝他加入樂壇25周年。城城初以為是普通生日飯，當他一打開門見到郭媽媽在場時，大為驚訝，開心得與媽媽擁抱，跟住看見一班相識超過十年的老友如張智霖（Chilam）、袁詠儀（靚靚）、沈嘉偉、余文樂、楊千嬅一家三口、金培達、導演翁子光、梁樂民、陸劍青等，令城城驚喜不已，他說：「我覺得好窩心。」而千嬅囝囝Torres見到偶像城城更緊張到手心仔都濕埋。

好友捐錢做賀禮

心情靚爆的城城全晚情緒高漲，化身「吹神」在台上拿住咪不停說話，非常搞笑，切生日蛋糕時，壽星仔特登拉埋媽媽上台一齊切餅，眾人齊唱生日歌，場面動人。城城生日願望是媽媽健康，自己事業再有突破，他說：「希望將來遇上有緣人，組織家庭，得到大家祝福。」昨日城城再在微博感謝友儕給他一個難忘生日聚會，再洩露心急結婚念頭，他留言說：「努力工作之餘也希望快點成家立室。」

孝順的城城攬住母親切蛋糕。	張智霖和袁詠儀上台搞氣氛。	楊千嬅和丁子高帶埋囝囝見城城。

Chilam與靚靚兩公婆十分有心，一直記掛城城生日，早前兩人到普陀山觀音寺，請了當地一位九十四歲法師題字寫「吉星高照」字畫送給城城，Chilam說：「城城物質嘅嘢都有，再送都冇意思，所以叫法師寫字，希望城城事事順境。」其他好友則將買禮物的金錢捐予城城之基金，捐助小朋友助學，令他生日倍具意義。

周潤發（箭嘴示）拍短片祝賀。

城城獲贈閃鑽熊貓慈善袖扣。

周潤發送上祝福

而周潤發、章子怡、張學友、林子祥、譚詠麟等紛紛錄了視頻向城城送上祝福。城城又獲高級男士訂製洋服品牌特別訂製閃鑽版慈善袖扣，以18Ｋ白金製作而成，配上240粒白鑽和90粒黑鑽，以及1粒珍貴的紅寶石點綴的「心」形，精緻華麗。

文：音樂組