阿佘假戲真做狂隊威士忌

「世紀情侶檔」佘詩曼（阿佘）與張智霖（Chilam）於電影版《十月初五的月光》再度合體。劇情講述多年後，演「君好」的阿佘重返澳門，為母親「QE」薛家燕慶生，又趁機與「初哥哥」Chilam、「金勝」唐文龍敍舊。

三人於大牌檔飲酒、食飯憶往事。不過，經歷喪夫之痛的阿佘，大受打擊後自暴自棄，靠飲酒、賭錢來發洩自殘。有次於街頭路經一雀局，阿佘更賭癮大發與有背景人士打牌，最終輸錢之餘更被灌酒，Chilam見狀本想幫忙頂酒，阿佘卻豪氣地一手拎起整支威士忌自隊！

導演鼓勵 醉拍更放

向來飲得的阿佘，透露拍攝前淺酌一杯：「導演問我有冇試過飲酒拍醉戲？我話冇，導演就話不如試吓，但我好驚唔記得對白，又唔知飲咗酒做戲會點，佢話唔緊要，如果唔滿意就擇日重賽，畀咗好大信心我，於是就放膽去試。」事後她坦言飲酒令她表現更放：「醉醉哋去拍，只要投入情緒、融入去感受君好嗰種痛，演出嚟連自己都覺得同以前有啲唔同。」

後巷爆喊 崩潰瞓地

戲中家逢巨變的阿佘，醉後直接攤在大牌檔後巷，一邊手震煲煙一邊含淚表白。後來她更於酒店割脈自殺，幸被Chilam及時發現獲救。拍攝期間，百分百投入的阿佘戲假情真，雙手一度不受控，而這場爆喊戲她更一take過完成。雖然阿佘貴為視后級人馬，但她亦毫不猶豫地瞓於又濕又污糟的後巷，相當專業。

文：影視組