黃家強抗拒男人幫變「BIG SIX」
由任賢齊、黃家強、蘇永康和梁漢文組成的「男人幫」於十一月廿七至廿九日在紅館開騷，昨日四子舉行簽唱會，四子以毛筆書寫「男人幫Good Show」來打氣，負責寫「人」字的康仔自嘲：「爸爸話人如其字，所以世界最醜嘅字會出嚟嘞。」之後四子又爆演唱會請另一組合「BIG FOUR」成員許志安和張衞健來做嘉賓。
但講到六人同台即變「BIG SIX」時，家強即搭嘴謂：「咁我要避一避先！」康仔反笑道：「點都唔夠你嗰半隊（指：Beyond）火爆啦！」小齊亦言：「我哋呢個唔係擂台喎！」
家強亦答得抵死：「咁我着定件避彈衣先。」康仔稱再加兩人變BIG SIX的話就要加票價到八百元一張，小齊又謂到時可以加入不同人去不同地方演出，像日本女團AKB48。若加一班「小鮮肉」入隊，不怕四人被淘汰？家強笑言：「我哋係小老（滷）肉，男人係愈嗒愈有味。」