朱慧敏月半彎 撼香香粉紅波
岑麗香與朱慧敏（Queenie）昨日齊為馬場活動擔任嘉賓，最近在電視劇演鯉魚精的香香穿粉紅tube dress騷三吋事業線，而自認是慳妹的Queenie，則以前短後長的晚裝裙突圍，在鏡頭前轉圈行「股」惑，露出裙下的「月半彎」美臀。
昨日岑麗香、朱慧敏及方力申等齊於沙田馬場出席活動，香香化身迷人Pink Lady，穿上tube dress露三吋事業線。
Queenie則以前短後長的晚裝裙突圍，消瘦不少的她即使低胸上陣也沒甚睇頭，不過她在鏡頭前轉圈拍照時就行「股」惑，露出裙下的「月半彎」美臀，即時成功搶鏡。兩人一上一下夾擊，大晒本錢，吸睛指數爆燈。
Queenie愛白飯魚
香香受訪時，提到自己在近日播出的無綫劇《無雙譜》中演鯉魚精：「係兩年前拍，（有網民話啲電腦特技假。）成套戲要配合，我演嘅單元係重感情嘅故事，鯉魚精有童話感覺，都幾配合。（覺唔覺兒戲？）我最近有睇，我比較注意自己嘅對白，啲對白好深，其實唔明講咩，要睇英文字幕先明，嗰時記得好辛苦，不過人生要有挑戰先會進步。（男友睇唔睇得明？）佢要睇英文字幕，佢識中文，平時我哋用中文同英文溝通。」
Queenie則表示自己的晚裝很安全：「好似泳衣嘅設計，裏面係肉色布但係感覺似透視，頭先嗰個轉圈我喺屋企練咗好耐，我着高踭鞋唔叻，頭先都要人扶，唔知以為我有咗。」Queenie又自爆是慳妹，平日只穿一對值$29的「白飯魚」：「啲衫爛咗會補番，同埋我會食齋，平啲，食果皮粥，$2食成日。要努力儲錢買樓，不過我慳自己唔慳人嘅。」
小方被女友嫌肥
小方以大會主題煲呔配西裝上陣，問女友Stephy喜歡他着西裝還是唔着？他說：「唔會唔着，佢經常覺得我肥，成日叫我減肥，可能佢瘦。」
文：名人組