錢嘉樂基因霸道 餅印女旺爸爸
上月誕下幼女Kassidy的湯盈盈，一直強調Kassidy似足自己，正當全城熱切期待一睹Kassidy真面目之時，昨日盈盈親自公開其真面目，Kassidy果然不敵錢家強大的基因，與嘉樂樣貌百分百match，一定不怕走失！錢嘉樂笑言兩個寶貝女勁旺他，又感謝盈盈全力湊女，縱然工作再忙、再苦也是甜！
講到基因最強，必定要數藝人錢嘉樂，太太湯盈盈前年為他誕下大女錢凱晴（Alyssa），上月23日二人再添幼女Kassidy，忙於工作的嘉樂日前去到南京開《歲月友情》巡唱，不過嘉樂依然心繫一屋三女，臨去南京之前，他不忘一家四口合體，為Kassidy舉行滿月派對。
當日除了嘉樂及盈盈的父母出席，當然不少得盈盈的好姊妹周家蔚、佘詩曼及梁靖琪等人，一班親朋好友在滿月派對上齊齊切蛋糕慶祝Kassidy滿月，場面熱鬧。
自Kassidy出生後，不少人都熱切期待一睹其真面目，一直強調Kassidy樣子似自己較多的盈盈，前晚終於在微博上載Kassidy的相，並留言：「我們的寶寶滿月啦！」Kassidy樣貌一曝光，網民紛紛一面倒指Kassidy與爸爸嘉樂似足餅印，有見反應熱烈，盈盈即「加推」新相，包括滿月派對相及兩張Kassidy的酣睡相，留言說：「真係咁似爸爸咩？望真啲……」從追加的Kassidy相中，可見她與嘉樂真的似到十足十，嘉樂果然基因強大！
盈盈餵人奶辛苦
嘉樂昨日接受本報訪問時，對於Kassidy被指與他百分百餅印是否感到很開心，他說：「梗係啦！不過我個人認為似盈盈多啲，其實真正係似外母，因為盈盈同佢媽咪好似樣。」至於想Kassidy先學識叫爸爸定媽媽，嘉樂就向太太賣口乖說：「大女係叫爸爸先嘅，我冇所謂，都想細女叫媽媽先。」
嘉樂又透露近日忙着湊女又要開巡唱，令他分身不暇，不過一見到家中「三個」女兒就覺得勁冧，笑言就算再忙都無力反抗，由於Kassidy年紀太細，嘉樂為怕自己太過粗手粗腳，照顧Kassidy的重任就交由盈盈負責，不過愛妻心切的嘉樂並冇偷懶，不時在盈盈身邊陪伴她湊女：「盈盈依家餵人奶，夜晚要起4次身，好辛苦，所以我會喺佢身邊陪佢支持佢。」而盈盈亦在電話旁幫嘉樂講好說話：「平日佢一得閒會幫手抱囡囡。」
中文名仍未決定
對於兩個寶貝女，嘉樂亦一視同仁，他提到大女Alyssa間中會對妹妹呷醋：「大女點都會有啲被忽略嘅感覺，有次我準備出門口做嘢，佢扁晒嘴，皺晒眉又攤喺地咁話so sad，搞到我唔想出去做嘢。」
嘉樂亦笑言因為多添一個女兒要捱多幾年，所以不敢推卻任何一份工作，幸好近年亦有不少工作機會，他表示從未想過自己可以揸咪唱歌，又拍劇又做動作指導：「咁多瓣數當然唔想錯過任何一個機遇，加上兩個女又咁旺我，大女旺攞獎（第49屆金馬獎最佳動作設計），細女就旺我開巡唱，所以我一啲都唔覺辛苦，反而覺得好甜！」至於Kassidy的中文名，嘉樂表示仍未有決定。文：專案組 採：影視組