傅穎被催婚 心郁「床戰」

藝人傅穎剛在上月底踏入31歲，中港兩岸的粉絲分別為她舉行生日派對，但由於近年她主力北上發展，經常與廣州粉絲搞聚會，令香港粉絲非常呷醋。Theresa表示在香港生日會與粉絲們玩「真心話大考驗」，期間一班粉絲醋意大發，她自責稱：「佢哋問我係咪唔理香港班粉絲，其實我都好內疚，覺得自己做得唔夠好。所以今次見到佢哋寫畀我嘅信都好感觸，有啲粉絲支持咗我十幾年，仲Keep住我啲相，見到之後我啲眼淚就控制唔到，喊到嘭嘭聲。」

保持新人心境

此外，單身多年的Theresa亦被歌迷催婚，她說：「有感覺好奇妙，有人留言話細細個10幾歲就支持我，但依家佢都結婚啦，但我依然仲未結婚。」雖然三十有一，但幸好童顏十年如一日，原來Theresa的保養方法不是靠甚麼神仙水、不老面膜，而是長期保持「新人心境」：「我覺得係心態問題，有時覺得自己仲係初出道咁，冇變得好犀利，好似係每次去新劇組，我都當自己係新人。」

嫌裸露唔好睇

近年專注拍劇的Theresa希望嘗試更多不同角色，問到可會介意拍激情床上戲？她說：「睇情況啦，我真係冇拍過大膽床戲，會睇吓咩故事、導演同對手啦，床上唔使裸露都可以嘅，因為我裸露唔係咁好睇囉，自己最滿意鎖骨咋，特別瘦嘛！」

文：音樂組