張家輝玩命自虐
張家輝自導自演的電影《陀地驅魔人》前晚在社交網站首發預告片，12小時內吸引近60萬人點擊，超過20萬人瀏覽預告片，令家輝感振奮，看着瀏覽數字不斷上升，如看股票上落。
預告片中家輝有不少自虐玩命鏡頭，以膠袋笠頭務求令自己窒息，隨後又用鋒利玻璃作割頸狀。片中出現不少趣怪驅魔方法，如掟炮仗、灌飲可樂等，家輝說：「我冇宗教信仰，戲入面驅鬼方法都係源自民間流傳，好似鬼怕炮仗，以聲驅鬼，其實唔好話鬼，我掟串炮仗畀你，你都驚啦！」家輝透露戲中要跟一群惡鬼打鬥，被打到飛起：「我對打鬥、動作係有特別喜好，我嘅電影世界打人同被打都咁多年，我對動作戲幾有要求。」
