歐陽巧瑩爆「攣」事扮男仔溝女
憑34C驕人身材上位的無綫「咪神」歐陽巧瑩（Tammy）爆猛料！她接受本報訪問時自爆4年前曾對性取向感迷惑：「係鍾意過女仔，唔知叫ＴＢ定易服廦，嗰時真係好鍾意扮男仔，2011至2012年嗰段時間好迷失，成日用第二個身份扮男仔出街、見朋友，甚至會特登開另一個帳號吸引女fans，好似分裂咗咁以另一個身份去滿足自己，真係有女仔鍾意我，有啲唔識嘅會follow我，了解我動向之餘仲會留言讚我。我唔化妝、短頭髮嘅話真係溝到女，諗返起都覺得幾好笑！」直到2012年後Tammy亦遇上心儀對象，肯定自己喜歡男人。
想扮演同性戀者
現時簽約無綫的她亦坦言局限多，期望將來有機會扮演同性戀者：「喺電視唔可以做啲太有爭議性嘅題材，如果有機會拍電影個尺度闊好多。真係好想試吓扮演同性戀者，或者係個角色仲未摸索到自己性取向。」
由懷疑自己「攣」，到確定自己「直」，Tammy勇敢去愛，更愛得相當高調！與男友林師傑感情穩定，但就堅持遲婚：「我依家先22歲，有批過命唔可以早婚，一定要30歲之後先結，如果唔係就會有兩個老公。而生仔就冇乜意欲，個責任好大，同鍾意小朋友係兩回事。亦唔驚人哋話我靠感情事上位，做得呢行點都要面對！」
