周柏豪坐叮叮慢遊香港
男神落區，請注意！周柏豪平日營營役役十分忙碌，他終於忙裏偷閒「特赦放監」，微服出巡與粉絲搭「叮叮」細味香港，期間憶起與周媽媽遊電車河的溫馨經歷，笑言媽咪是御用「母」特兒，不時為她拍攝旅行寫真。
型男周柏豪前日與一班粉絲坐電車「慢」遊香港，由北角出發到終點站西環，期間他在車廂拍照時，引來不少街坊舉機影相，在約一小時的車程中，柏豪化身「龍友」拍下港島街景，又與粉絲分享近況。
拖「模媽」微服出巡
向來是廿四孝乖仔的柏豪透露早前曾微服出巡，與周媽媽坐電車「叮」出母子情，他說：「嗰日我擺低咗架車去扮靚，我就同阿媽坐港鐵同埋搭電車，雖然嗰日有人認出我，但大家都好悠閒，冇話要同我合照，反而我阿媽就有影到我。」
他提到往日旅行時經常找周媽媽做私人「模媽」，為媽咪留倩影：「見到靚景就會叫佢企定定畀我影，多數影完一輪，叫佢影番我呢，我就會好勞氣，其實以前係佢教我影菲林機先，可能佢唔係好識用數碼機。」
將生活節奏調慢
柏豪又提到剛踏入社會工作時，曾在天后上班，每天都會以電車代步，問到可會與女友搭叮叮拍拖？他說：「冇呀，嗰時冇乜錢出街，多數係匿喺Studio自己寫歌，有時會一邊坐電車攞靈感。」他慨嘆平日在密麻麻的工作中，經常要追趕生活，下班「放監」後反而會享受慢活人生：「平時做嘢乜都要快，經理人就好似『獄長』咁押解我上台做嘢，有時想偷番啲時間畀自己，返到屋企就會坐喺梳化諗吓嘢，將個生活節奏調番慢啲。」
柏豪又透露正為年底在澳門新濠影滙舉行的演唱會操fit備戰，但預告今次音樂性較強，所以會惜肉如金暫時「封肌」。
文：音樂組