李嘉琪有幸獲周董簽結他

KillerSoap師妹李嘉琪（KiKi）在最新一季《中國好聲音》，憑住清新曲風在第一輪比試中，成功獲兩位導師周杰倫（周董）及那英「轉身」，爭住將她收歸旗下。她表示當時心情十五十六，遲遲未決定加入哪支隊伍，最終令另一導師汪峰稍有微言，KiKi說：「我揀導師嗰時有選擇困難症，徘徊咗好耐，當時有導師唔耐煩，汪峰仲話『你快啲揀你心入面想揀嘅人啦』，嗰刻我就係諗緊那英老師。」

拖那英練歌

她透露賽前原本計劃入周董隊，因為對方同是創作型歌手，怎料周董的一句說話令她卻步，KiKi表示：「周董話唔想我淘汰得咁快，因為佢嗰組有好多我呢類嘅選手，叫我不如都係揀那英做導師！」加入那英隊後，KiKi指對方率直爽朗，不時陪伴一班學員練歌，有次在放飯時間，KiKi在後台巧遇那英，她即拖住老師的手直奔休息室：「其他同學喺休息室度食緊飯，大家等試音等到好頹，之後我就拖住那英老師去畀驚喜佢哋，成班人即刻醒晒尖叫，仲衝過去搵那英合照。」

作為香港代表出賽的李嘉琪雖六強止步，但可以接觸到偶像已不枉此行！	張惠妹胞妹張惠春（左）與李嘉琪在四強爭奪戰中，分別以國語和廣東話版演繹。	周董與那英同樣為李嘉琪「轉身」。

淘汰逐個攬

雖然最終只能在那英組六強止步，未能晉級決賽，但KiKi在被淘汰一刻，有幸與偶像周董擁抱，更乘機向對方索求簽名：「當我走嗰刻同每個導師擁抱，我就同周董講『我要你簽名』，佢話『好呀』，最後去後台拎結他畀佢簽。」而在接受本報專訪當日，KiKi亦有攜帶這個無價寶結他到場拍攝，認真恨死隔籬。

文：音樂組