陳凱琳爆喊搵嘉穎開解

藝人陳凱琳奪得港姐冠軍後隨即被無綫重用，銳意栽培她成為新一代花旦，雙生一旦配搭的穿越劇《張保仔》是她的第三套劇集，在經驗、資歷尚淺下孭飛「女一」，壓力可想而知有多巨大。

已盡力問心無愧

陳凱琳受訪時說：「《張保仔》之前拍咗《名門暗戰》、《四個女仔三個BAR》，呢套係擔得最正、戲份最多，所以壓力好大，由拍到依家播都有壓力好緊張，外面好多評論，人哋會去搵嘢攻擊你。有次同婆婆食飯，佢話你冇辦法令每個人都鍾意你，問我有冇盡力？有冇嘢要後悔？我話冇，婆婆話咁就得啦，既然已盡晒力，都冇嘢做到，聽完都安心啲。」

陳凱琳自言有時壓力大得令自己爆喊，問到男友鄭嘉穎可有開解？她說：「會o架，佢好有經驗，佢嘅方法係唔會太理出面講咩，會聽番同行、監製意見，如果個個人講都聽一定會令自己唔開心，所以要聽番啲重視、重要嘅人講，套劇播緊佢喺大陸拍完劇返咗嚟，佢話會睇畀意見我。」

鄭嘉穎	陳凱琳拍攝時試過吊威吔吊足八個鐘，令盆骨感痛楚。	陳凱琳讚洪永城調皮好玩得。

怕被爹哋睇咀戲

劇中陳凱琳與洪永城有場咀戲，她指這場戲拍得舒服沒尷尬，拍一次就完成，因大家也不想翻拍。可會禁止嘉穎睇？她說：「唔緊要大家都係專業，反而怕Daddy睇，上次《四》有場kiss戲，Daddy話點解要拍啲咁嘅戲，佢最唔鍾意睇呢啲，到時可能要使開佢，哈哈。」陳凱琳與洪永城、陳展鵬也是首次合作，她說：「洪永城好調皮好玩得，陳展鵬就好認真，會問你睇完劇本有乜感受，會同你分析。」

採訪：影視組

攝影：嚴偉國

服裝：French Connection

鞋：Walker Shop