廖碧兒想盡快做媽咪

近年常往外闖的藝人廖碧兒（Bernice）早前在新加坡逗留了三個月時間，拍攝英語電視劇《Lion Moms》，劇中Bernice首次挑戰人母角色Jennifer，有一名15歲的兒子和6歲的女兒，她表示：「我未試過做呢種角色，唔係BB仔，係有個15歲大嘅小朋友。正常人拍完可能會驚咗組織家庭，但我拍完反而想盡快有自己嘅小朋友，因為同我合作嘅女仔好可愛。個個都知我好鍾意小朋友，我自己都養咗7隻狗仔。」

為愛降要求

劇中，Bernice是一個完美主義者，希望自己的家庭超級完美，問到與她的性格是否相似，她笑言：「我戲裏面嘅角色Jennifer，有少少卡通嘅幻想，我現實中份人比較真啲。不過其實我對自己嘅要求都好高，但如果我真係好愛嗰個人，都會降低少少要求嘅。」

拒一見鍾情

而在戲中與老公一見鍾情的Bernice，直言自己現實中未必會，說：「我未必會一見鍾情，我覺得要同對方溝通一段時間先得。戲裏面因為我哋係好早結婚，所以第一個小朋友都比較大，過咗一段時間，可能冇咗一種愛，個老公就出去滾，呢個現實中我都驚啊，所以要學識點樣溝通好啲！」談起愛情，Bernice認為一段感情要努力經營，不是永遠只有開心，一不開心便算數，她說：「我覺得true love要work on it，要努力，大家一定要好好溝通，相處同了解對方。」

廖碧兒指現實中未必會一見鍾情，要溝通一段時間才會發展。

廖碧兒母愛滿瀉，直言拍完劇更想做媽咪。

至於要一個人長時間在異鄉工作，Bernice說：「其實有少少似放緊假，拍戲最多都係10幾個鐘，一星期又有一日放假。但始終新加坡唔係自己屋企，都係住類似酒店咁，香港就可以返屋企休息。」她又透露由於此劇都是實景拍攝，感覺似拍電影。

文：甄之慧

圖：Ochre Pictures