洪永城7日初戀諗起想喊
無綫藝人洪永城、陳凱琳、姚子羚昨日到將軍澳寶琳一間中學宣傳台慶劇《張保仔》。洪永城與姚子羚講到初戀往事，甚受女士歡迎的洪永城透露初戀只維持了一個星期，還扮喊感慨愛情並不簡單。姚子羚的初戀更連手都無拖過，夠晒純情。
藝員洪永城、陳凱琳、黃智雯、姚子羚、龔嘉欣、朱璇等昨日在寶琳一間中學為無綫劇集《張保仔》宣傳並與學生玩遊戲，大受歡迎。洪永城自言讀書成績很差，幾乎次次考試都零分，所以後來要去外國讀書。講起初戀，洪永城表示是在中學發生，但只維持了一星期，慨嘆愛情並不簡單，還作狀扮喊。講到有指洪永城扮馬騮冧高層，他否認稱只是自己的表達方式比較誇張。
姚子羚有遺憾
姚子羚受訪亦透露初戀在中學發生，當時為暗戀的男同學加入籃球隊，後來漸漸發展成情侶，子羚對初戀表示既遺憾又好笑：「當時大家都好怕醜，拍咗拖半年，佢連手都唔敢拖我，亦都因為咁樣嬲咗佢，當時真係好純情，都有啲遺憾，初戀連手都未拖過。之後去咗外國讀書，第二次拍拖先至第一次拖手同初吻，諗番都覺得好傻、好好笑。」
陳凱琳冇人追
在外國讀書的陳凱琳被問到讀書時是否很多男仔追求？她笑說：「冇，佢哋唔敢，因為細佬受媽咪所託，睇實我，佢追女仔就無事，不過我諗細佬都唔想，佢都想我開心啲嘅。」有指鄭嘉穎在內地拍劇時與性感女演員傳緋聞，她說：「唔會啦，反而有啲好奇，對佢好信任，大家都互相信任。」
講到早前她與嘉穎外出拍拖，嘉穎與記者發生摩擦，她說：「佢有佢嘅處理方法，佢都係想有空間、私隱，所以先發生少少衝突。」
文：影視組