田蕊妮霸氣視后‧‧‧視帝都啱
視后田蕊妮於劇集《鬼同你OT》、《無雙譜》的演技再次獲網民大讚「神級」，成為今屆視后大熱！「三屆視帝」黎耀祥昨日出席活動時力撐對方：「直頭冇對手！」阿田則盼憑《鬼》劇贏視后，《無》劇奪視帝！
田蕊妮、黎耀祥和龔嘉欣等昨日出席台慶劇《無雙譜》活動，眾人於大埔林村許願廣場拋寶牒祈福，祥仔希望「公司年年賺大錢，個個加人工」，嘉欣則盼「個個攞獎，視帝祥仔攞，視后阿田攞」。
信心十足
對於劇中演技再次獲讚「神級」，阿田抵死笑道：「係咪我自己霹靂手打(口架)？其實完全係我化身《鬼同你OT》。」在旁的祥仔大讚她：「睇好你（攞視后），直頭冇對手呀！」阿田即舉起雙手打趣道：「我對手喺度！（滿意演出？）我點都滿意，演員做邊套戲都好，點都冇最好或最差，每次演出都有信心，有信心先可以企喺鏡頭前面。」
倘若《鬼同你OT》與《無雙譜》一起提名，豈不是分薄票數？她笑謂：「依家即刻好多對手，平手。（想邊套攞多啲？）隨緣啦，最公平係《無》劇攞視帝，《鬼》劇攞視后。」祥仔聞言笑說：「你攞晒都算公平？」阿田打趣表示：「我係咪時候攞『萬千光輝演藝人大獎』？」祥仔突然慨嘆道：「今年我攞先，都差唔多喇，連阿邦（陳國邦）都走埋。」
擴闊視野
提到陳國邦發「千字文」打算離巢，祥仔自言當年離開無綫也是因找不到新方向或演技上的特別方法：「喺同一個地方十幾年，都會覺得有少少停步，希望佢出去睇吓、搵到新突破。」阿田則不覺得是一潭死水，認為這行向來流動性高，又需要給新人機會及時間：「做咗好多年嘅去擴闊吓視野、經歷多啲嘢，人生多啲唔同角度令演出豐富啲。」
文：影視組