黎耀祥靠老婆投入愛郭羨妮
「視帝」黎耀祥日前於無綫劇集與郭羨妮演夫妻，他直言拍攝時將自己與老婆的恩愛經驗滲入角色，令觀眾更有投入感：「睇完會明白夫妻間相處，真係用個心同份感情係最緊要，我同太太感情不嬲都好！」
「三屆視帝」黎耀祥（祥仔）日前於無綫劇集《無雙譜》中，一人分飾斯文書生及粗獷獵戶。問到劇中與郭羨妮（Sonija）演夫妻的祥仔，有否投放個人經驗？祥仔即「開金口」，直認與太太梁耀蓮感情極好，實行乘機冧爆對方：「我成日都話我哋演戲裏面滲入自己喺現代生活嘅諗法同思想，咁令觀眾更有代入感。大家睇完會明白夫妻間相處真係用個心同份感情係最緊要！（拍完同太太感情更好？）我哋感情不嬲都好，因為我好明白呢樣嘢！我哋太早成熟，一早明白男女之間嘅緣分遊戲其實只不過係咁樣！」
生B後更見成熟
祥仔亦表示與Sonija的演出滲入真情，更從中深入了解夫妻相處之道：「我哋個故事滲透咗好寫實嘅現代夫妻感情關係，直頭係借古喻今！Sonija喺劇中婚前鍾意我份人純真，婚後就嫌我無所事事。拍拖同結婚後咁唔同，感情就出問題。」
提到與Sonija久未合作，祥仔大讚對方「升呢」為人母後演技更趨成熟：「我哋對上一次合作已經係2008年拍《Click入黃金屋》，佢做媽咪後成熟咗，我哋話題多咗。大家感覺好熟，而且默契又好！」祥仔又透露將相隔十年再拍電影，與吳彥祖及張孝全合作的他笑言因自己念舊情，所以事前未需與執導的林嶺東傾價錢。文：影視組