麥浚龍癡男有火

要數今年最受樂迷關注的名字，麥浚龍肯定榜上有名，他跟謝安琪（Kay）合唱的歌曲《羅生門》面世後，成功喚起樂迷的集體回憶，紛紛於網上轉載，風頭一時無兩。加上較早前推出的歌曲《念念不忘》及和莫文蔚（Karen）合唱的《瑕疵》等作品，組成全新EP《Addendum》，此碟是向十年前舊作《耿耿於懷》內描述的癡心男孩，以多角度重新審視對前度的癡戀。

承受雙重壓力

今次Juno的成功同時令廣東歌得到久違了的關注，其實整個計劃純粹屬無心插柳，Juno亦覺得一切都是緣分：「記得2012年我為阿Wy（黃偉文）嘅作品展做嘉賓，已經有傾過將《耿耿於懷》呢個故事延續落去，但當時我忙緊拍《殭屍》，到我拍完後要去好多影展同開始寫第二個劇本，當時算係最大壓力嘅時候。做番音樂對我當時嚟講係甜品，於是就真係開始同阿Wy去諗個故事結構，決定成張唱片去解構呢個男仔。」

麥浚龍	「成個計劃係無心插柳，係緣分。」	「我同年紀比我大嘅人溝通得好啲。」

滿以為做音樂紓緩寫電影劇本的壓力，怎料想與做是兩碼子的事，Juno說：「諗隻碟嘅時候當然係好開心，到做嘅時候先知道其實冇減輕到我嘅壓力，即係劇本要照寫，隻碟要繼續做，結果係雙倍嘅工作量。」《羅生門》的成功，Juno認為最值得開心是樂迷對廣東歌熱情一直未減：「我開心唔止係因為令聽眾接觸到一個十年嘅故事回憶同延續，更加係大家對廣東歌嘅熱情，同仍然有質素及追看性，所以成件事係所有人嘅功勞。」他承認出來的反應好，大家都好開心：「就算出嚟反應唔好，其實製作過程同物色演員成個過程，我已經得到咗快樂！」

周國賢、Juno合作，為專輯《Addendum》作結。	Juno與莫文蔚合唱《瑕疵》。	Juno與謝安琪合唱《羅生門》，引起樂迷的關注。

「成功需父幹」

近年有句網絡流行的詞語叫「成功需父幹」，亦因為《羅生門》成功引起大眾的關注後，不少網民直言當今香港樂壇，惟有家底豐厚的Juno才可以有能力用十年時間去打造這概念大碟，去仔細描述一名男孩的故事，對此，Juno淡然說：「十年係有個原因，如果《耿耿於懷》當年做完之後，即刻出《念念不忘》，未必有相同結果，亦說服唔到我。冇經歷過一段時間點稱得上念念不忘？依家呢個安排我覺得係一種緣分。」

Juno多年前離開主流唱片公司後，決定自組公司製作自己喜歡的音樂，隨心所欲的挑選合作對象，有條件慢工出細貨，靠的除了是銀彈充足外，還要有不落俗套的品味，不過Juno說得相當謙虛：「咁都唔係只得我，有好多歌手都可以一年先做一隻專輯，唔係年年都要出，每間公司有佢哋運作模式，只能話係道不同，唔可以比較。而每位音樂人都唔係單單做我嘅唱片，人人都可以搵佢哋，睇你點同佢哋溝通，並唔係因為我係Juno所以先可以咁做。」

搞概念性專輯

音樂上，Juno依然有團火：「我嘅專輯一向要有概念性，只係今次貼近群眾多啲，我本業係唱歌，其實我從來都冇放棄過，但係我好清楚知道，做一首歌或一隻碟，唔應該為咗一個機制、一個獎項或者一個頒獎禮去做，香港嘅運作模式同風氣好唔同，好鍾意鬥快同鬥多，但唔代表係一件好事。」

《Addendum》內另一首歌曲《雷克雅未克》邀來好友周國賢負責作曲、獻唱兼MV拍攝。然而，在拍攝MV時就爆出原本吳日言原來曾獲邀拍攝MV，她自稱因受不禮貌對待最終辭演。對此Juno說：「當時係想搵佢，但係我又冇跟進到呢件事，我覺得每個人都有佢發表意見嘅機會，我亦都有我自己對事情冇睇法嘅權利，因為我唔睇報紙、唔追新聞。」面對種種事非，Juno表示只會專心工作：「只係好小事，唔需要刻意去了解，我總之做好我嘅工作，呢個先係重點，人哋講咩嘢，人哋嘅睇法，有言論自由，我冇睇法亦都係我自由。」

後記：合作太濫

多年來跟麥浚龍合作過的名字不計其數，連他都說：「我諗同我合作過嘅，可以多到用『濫』嚟形容，的確，我同年紀比我大嘅人溝通得好啲。」每次有新計劃，想到合適人選Juno都會親自致電邀約，可有試過邀請失敗？他笑說：「好幸運地冇試過，萬一如果被拒絕，我諗成個project都唔會做，因為我只係諗到嗰個人係不二之選，所以如果Kay同Karen唔得，成個故事唔會係咁。」

文：曹家誠

攝影：秦健輝

髮型：Sam Pan

化妝：Khaki

服裝：Yohji Yamamoto、The Elderly Statemen Knitwear、Song For The Mute、Maesell