陳國邦拒變死水離巢無綫
前後効力無綫19年的現年47歲陳國邦昨日在微博以「千字文」留言感慨發展未如理想，不想將自己變成一潭死水，打算離開無綫。陳國邦正在台灣演出舞台劇，他透過短訊回覆說：「今晚（昨晚）首映，有乜可以暫時聯絡羅敏莊，遲啲返嚟再講。」
老婆撐開心要緊
羅敏莊昨日接受電話訪問表示老公陳國邦工作一直都不開心，她說：「佢有同我傾過，我話你鍾意點就點，我哋人生去到呢一步最緊要開心，佢依家喺台灣做緊舞台劇，出面工作仲開心過喺TVB入面。（擔心經濟？）當然會有轉變，但冇乜所謂，有粥食粥，有飯食飯，我哋屋企一路都非常開心。」
黎耀祥過來人
對於陳國邦有意離巢，無綫製作資源部總監樂易玲表示：「之前合約已經傾好晒，佢依家又唔喺香港，我都唔知發生咩事，要等佢返嚟再傾。」陳國邦好友黎耀祥則說：「少咗個好對手當然可惜，但對佢可能係一件好事，佢心情我好明白，十幾年前我離開無綫都有呢個心情，係突破唔到。不過我唔擔心佢，佢係一個好有才華嘅人，話唔定將來幾年後好似我咁，有個新睇法再返嚟拍劇。（有冇聽佢講過？）佢係一個好有原則同硬頸嘅人，冇同我哋講，但唔緊要，出到去大家都係好朋友。」
文：影視組