王祖藍做娛樂大亨幫港星北上掘金
藝人王祖藍早前豪擲1.14億購入逸瓏灣獎勵太太李亞男，原來財來自有方，最新一期《好報》披露祖藍升呢為邵氏兄弟電影製作人，又以千萬酬金接內地真人騷。日前孖亞男睇新居盡顯愛妻本色，成為人生勝利組的他受本報訪問時，直言想日後成立經理人部門，做娛樂大亨。
最新一期《好報》拍得王祖藍日前冒雨與太太李亞男睇新居，同行還有舅父冼偉智。由於風大雨大，祖藍撐起巨傘護妻，名副其實超級愛妻號。億萬新居逸瓏灣近3,000呎，更有私人泳池，婚後「解禁」的兩口子點「反」都得。買得起豪宅，祖藍自然財來自有方，除已接千萬酬金真人騷《女婿上門了》外，據知邵氏兄弟更將開條新Line給祖藍孖住王晶、劉偉強、陳友等影壇重量級人物製作電影，祖藍吸金真係「Easy執」！
《老表》另有計劃
祖藍身家十級跳，昨日接受本報電話訪問時，對於買大屋，他說：「我哋今次搬大咗，若果有BB嘅話，就唔使搬啦！不過，亞男真係幾慘，自從我多返內地工作，就變咗一人世界，所以我哋都係想過多兩、三年二人世界先！」談到「升呢」做邵氏電影製作人一事，他透露：「稍後將開拍一部古裝、一部時裝電影，而《老表》系列將另有計劃，暫不能公布！」
充當內地經理人
祖藍更直言恨做埋經理人，成「娛樂大亨」：「今次做製作人，除開戲外，主要想幫香港演員開拓內地市場。如果我自己間製作公司穩定嘅話，希望搞埋經理人部門，憑目前嘅關係幫香港演員搵啖飯食，因為香港演藝方面幾乎飽和。（安排亞男工作？）佢都有工作拍緊，好忙，我除咗係佢老公仲係佢老闆！（同外父外母一齊拍節目？）係呀，呢個都係亞男最開心，因為佢可以見到爸爸媽媽。而我又有時間一齊同外父外母相處，都係一件好開心嘅事。」
文：專案組
攝：追蹤組