醉Bob爆粗小春掟咪險開拖
藝人林盛斌（Bob）與陳小春前晚出席導演錢國偉婚宴時，飲到醉醺醺的Bob疑爆粗辣着台上獻唱的小春，怒火中燒的小春先掟咪繼而衝落台想「開拖」，一班「古惑仔」兄弟即上台拖他入房冷靜，慘被搶風頭的錢國偉坦言會做和事老相約兩人擺和頭酒。
導演錢國偉（Wilson）前晚於洲際酒店筵開五十一席迎娶拍拖多年的藝人女友陳宛蔚，出席賓客有「古惑仔」的鄭伊健、錢嘉樂、林海峰、陳小春、謝天華、佘詩曼、梁漢文、蘇永康及曾志偉等。全晚「亮點」則落在醉貓Bob及小春身上，婚宴開席不久，台上成為「古惑仔」舞台，眾人化身「咪霸」狂唱情歌，飲大兩杯的Bob突然衝上台「搞搞震」，期間疑有人爆粗辣(興)小春即場掟咪，並氣沖沖似找「晦氣」，伊健、洪天明及黎諾懿等人即捉住對方，並拉對方落台及入房，而Bob亦被多人隔開。
攬住唯唯三激咀
由於事出突然，令全場人目瞪口呆，身為兄弟的林曉峰、梁漢文及蘇永康輪住唱搞氣氛，散席時多位賓客對「掟咪事件」封嘴，身為主角的錢國偉埋單後大方受訪強調「冇事」：「小事，嗰啲叫氣氛，之後會搵佢哋一齊食飯。」此時，滿身酒氣的Bob由梁烈唯扶住走，並與錢國偉攬埋一舊，錢在Bob耳邊說：「冇事，兄弟嚟。」接住Bob邊行邊接受訪問，多次強調：「冇事。阿春係我偶像，我點會畀人鬧。（現場有人爆粗？）我畀人問候？梗係冇啦。（你需唔需要同小春道歉？）冇，兄弟嚟。」期間三度與梁烈唯咀嘴，而小春則由後門離開。
小春昨日接受訪問時說：「當晚已經即時解決，冇晒問題，多謝關心，Bob喺台上向所有人道歉，亦都有同Wilson講唔好意思，因為所有兄弟都係嚟撐佢。」梁烈唯則說：「大家過敏啫。」
斷晒片表示後悔
知錯的Bob昨日在微博發文感後悔，揚言會好好控制自己及酒量，不會輸給杯中物，他亦在電話中說：「唔好意思，斷晒片，今朝WhatsApp狂響，睇即時新聞先知，同唯唯咀完全冇印象，點返到屋企都唔知。」他坦言今次是一個好好教訓，以後會控制酒量。還說：「臨走前同小春講咗聲唔好意思，要向陳小春夫婦鄭重道歉，希望佢哋見諒。」
而錢國偉昨日已上深圳為古巨基今晚開騷籌備，他表示兩位主角已打了電話致歉，他說：「大家都係兄弟、朋友，好小事啫，朋友都會間中鬧吓、發吓牢騷，飲大咗啫，遲啲搵佢哋一齊食飯。」
文：音樂組