Jessica C.見肚 等嫁安志杰
混血索模「警鐘胸」Jessica C.（JC）與安志杰（Andy）自公開拍拖以來，愛得纏綿，昨突傳出懷孕的JC肚凸凸出席活動，孕味甚濃，而Andy直言未夠三個月不能公布並計劃結婚，默認有喜！
「警鐘胸」Jessica C.與男友安志杰昨日情侶檔出席活動，身穿超deep V長裙的JC肚凸凸，孕味甚濃，但不避忌蹲下與小朋友合照。二人公開拍拖約一年，一直愛得纏綿，由出場至接受訪問，全程拖手及翹手，如膠似漆，JC又不時為Andy拭汗，又一度玩餵食，肉麻程度爆燈！
JC在台上表示早前到內地拍劇，慶幸有Andy照顧，多累也拋諸腦後，又互讚對方完美。問是否可以「恭喜」二人？Andy說：「恭喜佢喺內地拍完三個月劇集，要開槍同好多動作。（JC身體唔好要照顧佢？）好掛住佢，所以上咗去陪佢一個月。」問是否趁這一個月造人？Andy笑而不答，在旁的JC指自己拍劇體力消耗得多，故吃多了，笑言肚裏全部是飯。
盼求婚有驚喜
問到是否按傳統未夠三個月不能公布？Andy坦言：「係。（結婚？）佢仲有嘢要做，我計劃緊。」JC隨後說：「我哋拍拖就嚟一周年，會去旅行，帶我去一個好浪漫嘅地方。」問到此行乃旅行結婚？JC即雙手掩耳，向Andy撒嬌說：「唔好講，我想有驚喜！」雖然Andy表示未求婚，但對於有否心理準備做父母，他坦言視對方為合適對象，JC亦大讚男友會是位好爸爸。至於身體可有不適，Andy踢爆JC胃口大開：「佢食好多嘢，佢鍾意食芝士，喺橫店冇外國式超級市場，惟有整畀佢食。」問到先當母親還是人妻？JC直言兩方面也可，Andy就表示旅行後便有好消息公布。
兩個月冇返港
而JC經理人Christine在電話中透露已兩個多月未見過JC，對於JC傳有喜，她未有否認說：「點解會咁問？我未有機會見佢，佢一直喺橫店拍劇，幾日前先返嚟，我差唔多兩個幾月冇見佢，佢部劇已經拍完，嚟緊都會出席啲活動。」
另外，名模Jocelyn及老公Anthony昨晚出席另一場合時，對於JC暗示懷孕，Jocelyn表示很久沒見JC：「如果係真就太美妙，唔係真就等下一次。（外國人都有三個月唔講得嘅傳統？）其實西方都有咁嘅傳統，三個月唔穩定，想確定BB嘅健康先至講，我唔知嘅由來係點，可能係醫生嘅建議。」
一戲定情 講心唔講金
名模Jessica C.（JC）與武打演員安志杰（Andy）去年因拍電影《屍城》撻着，終被《好報》踢爆戀情！去年年尾，二人再被拍得睇戲後，JC到Andy西環寓所度春宵，之後JC還直認到對方家過夜勁浪漫。他們人前人後極恩愛，不時孖公仔出席活動放閃，Andy曾揚言視對方為「Mrs. Right」！兩人向來講心唔講金，之前JC生日時就被《好報》拍得買外賣Pizza慶祝，而Andy雖只送對方值千多元的心形頸鏈，已氹得女友冧爆說：「佢送咗條頸鏈畀我，我好鍾意，好靚！」
文：名人組