周汶錡行性感棋「衩」一着

名模周汶錡（Kathy）與天后容祖兒（Joey）昨晚出席「全新Audi Q7發布VIP派對」，Kathy雖然已榮升媽咪，但打扮得依然相當火辣，除了大開中門，更大晒三吋事業線，噴血程度極高！不過名模出身的Kathy竟老貓燒鬚，穿上前幅開高衩裙子的她在擺甫士時竟不慎露出打底，更一度疑似走光，而當記者問到她是否需要勁多打底時，她完全不知自己走光：「冇得打底，但好安全。（有冇畀老公過目？）冇咩點問！」

三年抱兩想追女

而七月初以剖腹誕下兒子的Kathy，透露自己已收好身，與法籍老公Julien亦有計劃再追多一個B女，目標是希望可以三年抱兩：「因為開刀有傷口，最快半年至九個月先可以實行。（咁聖誕節開始實行？）聖誕節造人係最唔安全嘅平安夜，聽講叫老公少肉多菜，會容易生女。」

祖兒與奧迪香港董事總經理康博睿合照。

祖兒出席新車發布會，更即席高歌，令人聽出耳油。

旅行使錢冇限額

而同場的Joey則透露十一月會陪媽咪到日本及韓國旅行，但男友劉浩龍不會同行：「因為全部女仔，驚佢會悶！（唔搵機會畀男友同媽咪相處？）適當時機會！（負責出錢？）盡量！因為次次出trip都係因為工作，舊年都冇去旅行，媽咪知道我同佢去一連兩個旅行，開心到問我係咪發緊夢！（預幾多錢？）最緊要開心，冇限額！」另外，Joey透露自己所擁有的私家車已揸了近十年，笑言自己非常長情及重情重義。

文：名人組