Chilam引佘出動癱瘓銅鑼灣

張智霖、佘詩曼、薛家燕及汪琳等昨午於三號風球及大雨下，出席《十月初五的月光》電影版花車巡遊，於中環至銅鑼灣一帶派餅，沿途吸引不少市民圍觀。

到尾站銅鑼灣，Chilam粉絲更舉牌迎接偶像，現場有逾百人圍觀，擠得水洩不通，大會派四名保安維持秩序。

逾百人在現場爭相索取眾演員派的禮物。

《十》片由電視劇版的原班演員魯振順（左起）、張智霖、佘詩曼、汪琳及薛家燕演出。

自誇好抵用

對《十》片票房信心十足的Chilam，被問會否效法台灣藝人王大陸露股謝票？他笑謂：「好彩係『十月初五』月缺，唔係『八月十五』月圓，可以露少啲，況且咁多人喺度，實有人露得好睇過我，交畀家燕姐啦。」

Chilam稍後會返內地參與另一真人騷，有指內地因藝人身價問題，正打壓真人騷，Chilam謂：「我好抵用，應變能力好，好適合做呢啲節目。」談到忙於為稍後的廣州個唱操弗，他呻其實不享受做運動。

阿佘多人斟

經常被拍得約會異性的阿佘澄清說：「冇拍拖，但唔會因此影響正常社交。」明年2月約滿無綫的她，再強調想向電影界發展，故一切未有定案：「多謝出面有公司賞識我。（邵氏同荷里活電影公司合作。）係好機會。（之前樂易玲約食飯說服你？）乜都有傾，朋友嘛。」

將到西班牙等地旅行的薛家燕，得悉Chilam推薦她露肉謝票時即稱：「15年前為《十》劇宣傳時，試過着印住美女着三點式泳衣圖案嘅T恤出嚟，但依家唔啱着，畀啲時間我諗吓搞新意思。」

文：影視組