唐貝詩27歲先啱timing

商界打滾 磨練性格

寇鴻萍長女唐貝詩（Lydia）自小跟隨母親出入ball場，原以為畢業後會向娛樂圈發展，怎料她卻轉身走入商界，打理母親的網購生意，在商界混得如魚得水之際，Lydia再次出人意表地宣布加盟蕭定一的電影公司，由女強人搖身一變成為張智霖師妹。

「其實我一直都熱衷電影，讀書時做過舞台劇，畢業後有唔少娛樂公司向我招手，但條件始終唔係太適合，加上當時我冇諗過要簽公司，直至近年諗法開始轉變，覺得如果正式做藝人，有間公司會畀人感覺專業啲，接job、傾嘢都會方便啲。後來喺媽咪嘅穿針引線下，我就簽咗畀阿一（蕭定一），佢係我哋嘅family friend，識咗好多年，好熟，阿一公司嘅透明度好高，好值得信賴，令我好有信心。

雖然有人會認為我依家先入娛樂圈，係太遲起步，之前幾年喺媽咪間公司做好似浪費咗咁。但我嘅睇法啱啱相反，依家先係入行嘅最好timing，因為出嚟社會做嘢之前，我個人比較任性、唔聽話，如果我咁早就出道，可能因為性格太差，一早就畀人淘汰咗，但做咗幾年嘢之後，學識同唔同人相處，亦知道一切得來不易，會懂得珍惜同謙虛。」

唐貝詩	唐貝詩直言以前性格差，若早入行或已被淘汰。	唐貝詩直言感激母親穿針引線，助她入娛圈。 （左起）梁廷鏘、唐貝欣、唐貝詩、寇鴻萍

等緣分 拒戀夜蒲男

Lydia自從與名媛毛玉萍兒子Eric Yu分手後鮮有緋聞，雖然Lydia的演藝事業剛起步，但她並不抗拒新戀情，當緣分來到的時候，她還是會跟隨感覺而行。

「公司冇話唔畀拍拖，佢哋好開通，依家嘅感情生活空白，我唔會抗拒拍拖，順其自然，我覺得拍拖對演戲有幫助，係一種情感一種經歷，可以更加投入角色。但我希望另一半係對我有正面影響嘅人，例如我依家好勤力做運動，我都想對方鍾意做運動，而唔係一個鍾意去蒲嘅人，我好努力先建立到咁有規律嘅生活，我唔想破壞咗佢。」

從商幾年的唐貝詩，一直對演戲有興趣。	唐貝詩也是愛貓之人，當年的無心之失令她明白要慎言。	「盆景貓」事件令唐貝詩被網民狂轟。

網上捱轟 學懂慎言

自認年少輕狂的Lydia曾試過因「盆景貓」事件而引起軒然大波，被網民口誅筆伐，經過多年才洗底成功，對於往事，她也有深切反省及體會。

「其實發生盆景貓事件好幾年之前，我已經知道盆景貓並唔係真有其事，所以當時有人將盆景貓舊事重提，仲信以為真，我就喺社交網站同朋友開玩笑講：我都買咗！不過就畀其他人不斷轉發，搞到好大件事。我真係冇諗過一個無心之失會演變成咁，我唔係圈中人，冇意識到嚴重性。當時不斷畀人鬧好大壓力，經過呢件事令我學懂要慎言，亦有信心將來嘅風風雨雨，自己都有能力承受到。

可能有人會話我係靠媽咪、靠人事關係而入行，其他人點講唔會對我有影響，我好感激媽咪對我嘅支持，冇佢嘅支持，我都冇機會入行。現階段最重要係做好自己，每日會去健身做運動同上演藝課程努力裝備自己，亦減少同朋友飲嘢，一來係為減肥，二來唔想畀人影到。以前關於我嘅新聞都係緋聞之類，依家要收埋自己，想畀人有種fresh嘅感覺。」

唐貝詩與毛玉萍兒子Eric Yu分手多年，現時感情生活空白。

陳嘉桓（左起）、唐貝詩與盧頌恩早前拍攝節目，於郵輪上大解放。

攝：劉智源

化妝及髮型：Kennie Lam

場地：L16 服裝：Lily Brown、ROXY