妙芝學琴速成變身唱作人
名模歐陽妙芝走入錄音室唱歌，連她自己發夢也未想過，但她真的做了，不單止唱歌，還作曲填詞，新作《愛一世》完成，準備將此曲送給她愛的每一位。而且，她更被細仔封為偶像。
由選美出身，之後進身模特兒，又開化妝學校的歐陽妙芝，工作與娛樂圈千絲萬縷，雖育有兩子貴為媽咪級，但她仍然非常活躍，去年起她便隨鋼琴老師Willy學琴，速成班學習琴藝，現時每星期她會到資深音樂人Benson開設的studio錄歌，逐步向音樂界邁進，她說所有事情都是無心插柳：「有次同張崇基講開好想學琴，佢就介紹咗鋼琴老師畀我識，佢用速成法，加埋我嘅天分，一個月已經彈到，哈哈！平日好鍾意哼一啲自己作嘅音，琴老師叫我哼畀佢聽，佢就將啲零碎嘅音組成，修改砌成一首曲，冇諗過會有咁嘅結果。」
喊住唱《愛一世》
曲完成後，在各方的鼓勵下，妙芝嘗試填詞，她說填詞的時候，心想着一位心儀的對像，這位填詞初哥，笑言初版像小李飛刀一樣，不夠浪漫，未能見人，但幾經修改後，今年她終於完成處女作《愛一世》，現在每次唱起這首歌，她也會激動地喊，她說：「我個性向來只是3分鐘熱度，去到某一個階段就會放棄，人生好似永遠都click住click住，一事無成，係身邊朋友畀咗好大信心我，好似學琴，每次想縮時，琴老師就同我講已經洗濕咗個頭冇得縮；係Benson鼓勵我唱和音，自己都估唔到會唱到，佢又會提醒我唱歌注意口水聲，教我唱歌好似演戲一樣。」
影響細仔學作曲
由彈琴、作曲、填詞，到錄製成一首歌，下一步呢？她笑言好多朋友表示會仗義相助她拍MV呢！她說：「自己最想將呢首歌送畀我愛嘅每一位，最感動係，原來我做嘅嘢都影響緊其他人，好似細仔依家將我首歌填咗英文詞，又學我作曲，佢本身好鍾意音樂，依家佢當咗我係偶像。」妙芝對兒子擁有的無窮影響力，又怎會是一事無成呢！
文：名人組