林欣彤醜得喜鋪路上樓
歌手林欣彤（Mag）因參加《超級巨聲2》奪冠而出道，入行五年的她星路並非平坦，早年患抑鬱症更令她事業停滯不前，幸好現時一切已事過境遷。變得樂觀的她坦言滿意入行五年成績，亦揚言想再嘗試拍戲，更有意挑戰喜劇醜女角色！愛錫家人的Mag表示想再置業，目標是10年內買到2,000呎的單位與家人同住。
走過抑鬱覓新生
Mag早年因自覺拋棄患病的嫲嫲而逼到自己患抑鬱症，現時病愈的她無懼提起往事，更主動把此段成長經歷融入歌曲《金剛圈》中，但原來現時她間中仍會發噩夢憶起患病的痛苦感覺，不過她認為只有勇於面對脆弱才能解開心結。
有時會諗起以前嘅嘢，錄《金剛圈》嗰兩日有發噩夢，唔記得發咩，有時發嘅夢係冇內容，但夢醒係好辛苦、好綑綁，病緊嗰啲感覺湧出嚟，但發完就冇事。
面對心結嘅一個方法係掂個結，冇得擺佢喺度等佢自己解開。首歌其中一句歌詞講得好啱，「從脆弱處練出一份勇敢」，邊度脆弱就喺邊度練到勇氣為止。真正勇敢唔係乜都唔驚，而係你好脆弱，但你面對到個脆弱！我都感激有呢個（患病）經歷，雖然比較痛苦，但都係認識自己嘅一個過程。
買豪宅預埋家人
買磚頭是最穩陣的投資，Mag直言想10年內買到2,000呎的夢想居所，與家人共築安樂窩！
之前試過置業，但我想再儲多啲錢買樓，因為租屋好難完全以自己心意去裝修或布置間屋，我嘅夢想居所係同屋企人一齊住，希望可以有兩層，或者係隔籬屋。因為我做嘢會嘈住佢哋，半夜想練歌都驚嘈住，所以隔籬就啱啱好。
面積方面，我自己一個嘅話幾百呎都夠，加埋屋企人就想要2,000呎，希望10年內可以令我同屋企人都住到一個好地方。我平日最多使費都係去咗衫、髮型同化妝度，但平時都會盡量慳，所以賺嘅錢都夠用，爹哋媽咪成日教我，有好多嘢預計唔到，所以永遠都要儲錢，用嘅錢永遠要少過賺嘅錢。
扮八両金過足癮
自2010年奪《超級巨聲2》冠軍後，轉眼間Mag已入行五年，期間她推出了數張個人專輯，又舉行了個人音樂會，更試過拍電影，勇於嘗試的她坦言想再拍電影，揚言有意挑戰扮醜拍喜劇。
入行五年都滿意自己成績，因為個人進步緊，覺得名同利要視乎天時地利人和，所以我會睇個人有冇昇華。我會聽番以前同依家唱歌做對比，仲有聽番人哋同我講嘅嘢，覺得依家嘅我係更加隨心同隨性做事，以前拘謹啲、太多雜念。
依家想再試吓演戲，演戲好精彩，可以暫時擺脫自己嘅人生，做另一個人，感覺好神奇。想試吓扮醜拍喜劇，之前試過為音樂會拍宣傳短片，我哋重演《食神》嘅情節，我扮八両金，我唔介意扮醜，只要好笑就得。一係咁諗，如果你睇到我醜嘅樣，再睇番真實嘅我，係咪覺得靚番啲？所以想拍喜劇，但我覺得係一門高深學問，自己都鍾意睇，可以氹人笑就好。
後記：篋神親力親為
訪問當日Mag帶備一個自家行李篋擺放服裝和高踭鞋，雖然有工作人員傍住，但個子嬌小的她仍無把拖篋一事假手於人，事事親力親為！
文：音樂組
攝：劉智源
化妝：Miko Wong（Cyrus Lee Team）
髮型：Ritz Lam@Hair Corner