林芊妤心痛懺悔 喊到抽搐
女星林芊妤（Coffee）昨日凌晨在網上直播中，重提去年的「殘廁Gathering事件」，一度激動狂喊至全身抽搐，她強調當日與「殘廁男」只有Kiss沒有性行為，事件令她覺得愧對家人，即使過了年多仍未走出陰霾。
林芊妤去年六月因「殘廁Gathering事件」而廣為人識，由天使妹升呢話題女王，然而這年多不斷被人指指點點及冷嘲熱諷，昨日凌晨Coffee在網上作出深情剖白，一度失控爆喊。
失眠情緒崩潰
昨日凌晨Coffee與網友傾偈時，有大批網友重提「殘廁事件」，Coffee終忍不住剖白當日與「殘廁男富二代」發生的事情：「當日我哋去食飯，叫咗兩支紅酒，我係比較飲得，但飲咗第二杯Shooter，突然覺得好醉想嘔，於是去咗殘廁嘔，話我哋入咗去半個鐘，其實大約得九分鐘咋！我發誓我哋係有Kiss，但冇搞嘢，冇發生性行為！」
及後Coffee返家後有跟胞兄訴苦，當時胞兄安慰她說：「你都唔紅，驚乜嘢？」但Coffee仍失眠，當事件經報道後更陷崩潰狀態。
心痛被指係雞
說到這裏，Coffee淚如泉湧，一度喊至全身抽搐，直言是首次在四千人面前落淚，她說：「件事令我覺得好對唔住家人，爹哋畀親戚啲WhatsApp我睇，話覺得好丟架！我嗰段時間人唔似人鬼唔似鬼，匿喺朋友屋企一星期冇沖涼、冇刷牙，每日淨係識喊！網上成日畀人話係『雞』、『殘廁』，我好心痛！過去一年我都非常負面，但有好多正面嘅留言支持，我一定要企番起身。」
昨日Coffee接受電話訪問時，表示有太多網友提及「殘廁」事件，原本她並不打算再講，但最終忍不住「山洪暴發」：「我只係想同Fans私人傾偈咁，不過講完都後悔，驚畀人覺得炒作，以後拍片會盡量講少啲私人嘢，主要拍我做瑜伽。」
文：影視組