甄子丹打勻歐洲演葉問被點相

甄子丹昨日與新片《葉問3》的監製黃百鳴，到昂坪市集為於12月上映的新片進行宣傳，子丹即場與約70位東涌區小朋友，欣賞一齣講述港產動作電影的短片，之後再上台與小朋友練習詠春，「宇宙最強」大受小朋友歡迎，子丹自爆可能因為自己也有小朋友，故愈來愈喜歡小朋友的純真笑容，又指老婆仔女都會為他拍戲受傷而擔心。

提到新片預告片點擊率，子丹興奮說：「已經接觸到一千萬個用戶，有二百萬個點擊開嚟睇，我好驚訝又開心。（觀眾餓《葉問》太耐？）係其中一個原因，我同個仔去波士頓參觀科學館，有個11歲小朋友跑過嚟大嗌：『Ip Man（葉問），I love you！』喺歐洲好多地方嘅coffee shop都遇到相同情況，可見影響力深遠，觀眾呢幾年餓《葉問》太耐，希望第3集會睇得滿足！」

甄子丹喜歡小朋友純真笑容，投入得跪地陪玩。	甄子丹與小朋友練習詠春。	黃百鳴透露「葉問體驗館」於下月尾展出。

想試反差大角色

子丹新作雖然千呼萬喚，但他對新片冇壓力：「我拍完第2集已經諗住唔拍，因為當時冇新角度，我又想試啲反差大嘅新角色，後來導演葉偉信話諗到新角度，咁就拍第3集，加入泰臣同張晉，有新穎、燦爛、突破嘅武打。我好興奮泰臣加入，我係佢拳迷，佢拳路我記得晒，但都擔憂佢拍戲錯手會點呢？萬一走錯位點算？二百幾磅力打埋嚟，所以我都諗定兩手準備，但合作過後，發現佢係性情中人，我哋做埋好朋友。（網友指泰臣演呢齣戲係降grade？）佢有相當多戲份，但我唔透露太多，總之唔會令觀眾失望，因為我同葉偉信導演都係有要求嘅人！」

黃百鳴則表示與昂坪合作的「葉問體驗館」將於11月27日起展出：「《葉問》電影系列帶出獅子山下精神，觀眾可以睇到戲中人點樣面對難關。」

呷醋冇人像畫收

此外，甄子丹與太太汪詩詩昨日出席藝術展覽晚宴，子丹透露愛女非常熱衷畫畫，整個辦公室也是其畫作：「佢咩畫都會畫，特別係油畫同中國畫。」問到愛女可有親手畫人像畫給他？詩詩搶答：「佢有畫人像！但係畫Iron Man個演員羅拔唐尼（Robert Downey Jr.）。（老公有冇呷醋？）有呷醋。」

問到懷第二胎的妹妹汪圓圓身體情況？詩詩說：「好好！（男定女B？）唔知！」而子丹亦體貼代答：「等佢兩公婆講！（電影《葉問3》首映圓圓會撐場？）點都會嚟撐姐夫場！（有好多打殺場面？）嗰時要揞住隻眼。」

文：影視組