姜皓文愛老婆日日諗Surprise
在圈中浮沉多年，直到《証人》令姜皓文（黑仔）為電影人所熟悉，劇本接踵而來。他坦言當年「細路仔唔識世界」浪費了不少時間，但懂得堅持令他終捱出頭來，更被封「綠葉王」！除扮演觀眾既定印象中的「黑社會大佬」，近年多次飾演「慈父」的他與老婆結婚十五年無所出，原來他已習慣享受二人世界，並把家中寵物視為兒女，自言太愛老婆的他每天都想為對方製造sweet爆小驚喜！
老婆爆粗即收聲
一提起老婆殷寧（原名金慧英），黑仔即展現出「鐵漢柔情」的一面。
「結婚15年又冇話點keep，老婆好鍾意新鮮感，我就盡力配合，開個飯都搞到每日去咗新餐廳食飯咁！佢一直都好支持我，係全世界最包容我嘅人！我喺出面有咩事，返到嚟又呻又發晒脾氣，心情唔好我真係返到屋企成日拎嘢嚟嘈，仲嘈到歇斯底里，佢都仲係一樣咁包容我！佢由一個斯斯文文嘅女仔，到學識咗講粗口都係因為識咗我，依家佢一忟一講粗口我就識收聲。
我真係要好好對佢，我有咩都會畀最好嘅佢，諗乜都要以佢為先！又唔使話點樣多謝佢，就繼續對佢好囉，冇辦法啦太愛佢喇！成日都想畀surprise佢，唔想再好似以前咁，畀舊錢叫佢自己買禮物畀自己喇，好似早幾個月前過咗15周年，我就搵朋友教我，親手整蛋糕送畀佢！我做過好多慈父角色，但冇生小朋友，冇去特別諗過呢個問題。自己啲細佬妹全部都有小朋友，太太嗰邊嘅親戚亦一樣。依家對住啲寵物都夠頭痛，我幾忙都好都會抽時間同老婆一齊照顧班寵物，所以平時我好鍾意留喺屋企。」
嘆虛耗光陰
1986年參加亞視《電視先生選舉》，奪得亞軍後入行，轉眼接近30年，黑仔承認自己虛耗太多光陰。
「入行成30年，近呢幾年好多戲接，我唔覺呢個『高峰』嚟得太遲！好多嘢都係講timing，唔到你就唔到你，最緊要我堅持，一日喺度我覺得排隊都輪到我啩？由(靚)仔入行到依家，無可否認我行咗好多唔可以叫係冤枉路，但當時心態係玩玩吓，有心機做戲但冇人指點我，去教我條路要點行，就亂打亂撞咗起碼十幾廿年。我冇後悔過！以前喺電視台年年都好多嘢做又爆show，搞到我從來冇去諗要出去闖，如果當時識去冒險，可能依家嘅我又唔一樣。」
慢熱礙星途
圈中跌跌碰碰，性格過分慢熱令黑仔被質疑沒有成為演員的「格」。
「自己都曾經覺得唔啱入行，身邊有人講過我性格問題！我個人好慢熱同內向好多人就畀我個樣嚇親，正一鱷魚頭老襯底！你畀劇本我我就去做，有行家都叫我諗啲嘢出嚟畀佢寫吓，我話冇喎！原來佢哋叫我作啲嘢出嚟講，我先知『啊！乜係咁架？』啲人都話我唔識做呢行，我都覺得佢講得啱，但我又繼續行自己嘅路囉！依家多咗嘢講已經好咗架喇，以前我升到中一，小息先識行出課室，都只係因為做咗風紀咋！以前都係落去買串魚蛋買支奶又走番入去坐。」
拍戲滿足感大
終於由電視框跳到大銀幕，黑仔坦言要揀一定揀拍戲！
「由電視台走出嚟拍戲，學識咗好多電影知識，好多嘢唔同電視。首先客路已經唔同，我拍咗電影咁多年，依家去入油都有阿姐同我講『咦？你冇拍嘢喇喎，你係咪轉咗行？』我明明拍咗好多戲點解佢會咁問呢？原來佢哋唔會嘥錢睇戲。你話入屋就當然係電視，行出街又多人認得你，好深入民心，電影就慢熱好多，但係畀到更多實在嘅得着我，滿足感亦大好多，所有製作都好細微！試過拍咗一排電影，返去拍電視劇自己都有啲唔習慣。」
感激伯樂提攜
電影界發圍，都要多得看得上你的伯樂。
「演藝生涯入面，我嘅轉捩點係林超賢導演嘅《証人》，開始咗令電影人認識我同留意我，雖然我喺入面戲份唔多，但佢好畀心機去指導我點做好呢個小角色，可能好多人都唔會好似佢咁，咁細膩去同你講戲，真係要好好多謝佢！另一位導演我亦要好感謝，就係杜琪峯導演，佢都係一個好識指導演員嘅大師！」
睇好張繼聰
自覺未夠班的黑仔未敢指導後輩，但直言睇好張繼聰及王菀之。
「要入戲去做一啲現實生活唔會做嘅角色，會上網搵吓資料啦，亦有老前輩教我周街行，周圍望，真係好有效！同埋唔好熟讀劇本，最好接咗返嚟望吓就算，去到現場先再睇，真係work，嗰陣時讀會好新鮮！最近我幾欣賞張繼聰，佢好特別，有一套自己嘅節奏但又幾好睇，同佢合作嗰陣自己未埋位都會好留心睇佢拍戲。同埋王菀之啦！真係一個好演員，佢好勤力，亦好平常心咁去做戲，愈淡就愈好睇，就好似佢咁唔需要好用力咁去做。」
後記：難忘跳七次樓
問到作品無數的黑仔，要挑選最難忘的拍戲場面時刻，他說：「真係要數《殺破狼II》嗰場逃亡戲，當時喺新碼頭拍一場畀警察追殺嘅戲，一日之內我由8樓跳樓跳咗7次，再加跳海跳咗8次，簡直係畢生難忘嘅經歷！」
口述：姜皓文
筆錄：陳丹
攝：秦健輝
場地：Namo Avant Thai Restaurant
妝髮：KaPlusMakeUp
服裝：A.P.C@IT