胡定欣V殺唔錫身
藝人胡定欣、陳展鵬昨日為新劇拍攝外景，二人拍此劇瘦了多磅，穿上低胸黑衣的定欣盡顯貼身誘惑，而瘦了的展鵬打起來更靈活！
胡定欣及陳展鵬昨日在無綫為文偉鴻監製新劇《城寨英雄》拍攝，定欣以貼身黑衣裝示人，埋位時胸前拉鏈再向下拉，既性感又有型，她說：「套衫度身訂造，我好鍾意！但由造型到依家，我瘦咗幾公斤，褲有啲鬆，但預嚟吊威吔啱晒，依家咁樣就最fit！呢個劇我好多一個鏡頭做幾個動作嘅戲，係種挑戰！之前拍碌地、翻觔斗，墊唔到pad，手臂瘀晒。（男友心痛？）佢有叮囑我，但佢知我要求做到最好！」提到將參演新版《執到寶》，她說：「我同歐陽震華、羅蘭、胡楓未真正合作過，好期待同前輩們合作！我有睇舊版，記得黃韻詩嘅演繹。（會參考佢演法？）未傾故事，我諗新版只會保留部分元素同感覺。」
陳展鵬一個打幾個
展鵬昨日一個打幾個，自爆「打到瘦」，他說：「我好多同武師嘅對打戲，我鍾意真實感強嘅打鬥！拍呢個劇瘦咗5、6磅，我覺得瘦咗仲靈活。」有傳他與洪永城不和，展鵬謂：「我不嬲少新聞，唔會傷害到我哋感情，傳大鑊啲都仲得！（點睇洪話你要檢討？）啱呀！我直頭要檢討，只要宣傳唔傷害到任何人，我ＯＫ啦！」
文：影視組