黎瑞恩笑看生死：行咗咪行咗囉!

歌手黎瑞恩昨日為好友李國祥的演唱會進行綵排，略見疲倦的她表示身體仍然「飄吓飄吓」，又憶述當日暈倒情況：「嗰日突然好似老花咁睇嘢矇晒，好似有兩道黑色嘅閘合埋兩隻眼，住咗兩、三日醫院，照晒腦，出嚟冇事，陣間再去醫院覆診，突然間超低血壓。」她又指暈倒的原因不明，亦與其胰臟腫瘤無關，癌細胞指數則低了一半。

同前夫關係變好

有指黎瑞恩當日更嘔白泡，她說：「我唔知喎，淨係知有抽筋，有一邊面戚起咗，好似瞓咗個好舒服嘅覺咁，醒咗聽到個女喺度喊。」她笑言不擔心身體有事，豁達地說：「行咗咪行咗囉，不過我冇咁快住嘅。」問到緋聞男友鄭應南有否關心她，她說：「個個朋友都有關心，（前夫有問候你？）有打電話問候，分開咗仲多咗溝通，做朋友好似仲好啲，（同小朋友見多咗？）有，對小朋友好好，小朋友都感受到。」

黎瑞恩為好友李國祥演唱會綵排，唱得相當投入。

黎瑞恩指緋聞男友鄭應南亦有關心問候。

送仔女外國讀書

她又表示將來會送仔女去外國讀書：「出年會跟去，已經諮詢咗啲學校，不過唔急嘅，本來Plan長期留喺外國，最後都係諗畀佢哋去寄宿學校，有短假期就飛過去。」

至於個唱將至的李國祥直言不會緊張，對於黎瑞恩暈倒送院，他指當時有打電話問候對方：「朋友梗係要互相關心，今日同佢一齊嚟，都有話唔舒服，但係照晒嘢話冇事，成日提住佢都唔好啦！」

文：專案組