肉緊拉票
十套候選經典劇中餘下五套的演員，亦為當年所演劇集「肉緊」拉票，並道出當年拍劇時的難忘事。
歐陽震華《壹號皇庭》
法庭戲好認真，離開法庭就唔同晒，好似雙重性格咁，幾嬉皮笑臉，好優皮，我同陶大宇好多即興對白，觀眾就係鍾意咁！
甘國亮《執到寶》
《執到寶》係1980年同王家衛、林奕華一齊編劇，人人話係黑色喜劇，我哋就覺得係溫情喜劇，由喜劇泰斗劉克宣由頭帶到尾，佢離開我哋卅二年，如果套劇重播，或者佢係會嚟你屋企同你一齊睇！
陳秀雯《孖仔孖心肝》
周星馳呢個對手反應另類，接唔到佢囉，有場戲我做姊妹着低胸喱士裙，用圍巾包住，星仔見到話：「唔使嘛！」到底係我冇身材唔使遮呢定係心口唔低唔使遮呢！
陶大宇《刑事偵緝檔案》
部劇拍出破案手法常規，當劇本係偵探小說咁睇，亦係無綫破天荒一年內播第一及第二輯而寫下紀錄，拍足四個月日日瞓得幾粒鐘，攰到對白要逐句拍。
關禮傑《新紥師兄》
套劇講班年輕人為追求理想要做個好警察，我個「好姐」角色都好深入民心o架，要睇劉青雲、梁朝偉、呂方同我以前嘅可愛樣，就要支持啦！