劉嘉玲險墮電話騙局機警退賊
影后劉嘉玲昨日出席慈善活動，自爆早前與母親分別遇到電話騙案，幸好最後以機警嚇退蠱惑騙徒，因此呼籲市民要多作防範！
劉嘉玲昨日以榮譽大使身份出席「香港Globe-athon 2015」慈善步行起步禮，身體力行支持香港婦科癌症教育，她表示身為一名演員，對身體狀態有一定要求：「會做運動同曬太陽，因為曬太陽可以殺菌，而且仲係免費，自己每半年至九個月就會去做婦科檢查，同埋均衡飲食！」又指不時介紹女性友人作婦科檢查：「身邊人好似阿梅（梅艶芳）遲咗發覺，問題就會大咗！同埋啲女仔好少留意自己身體狀態，應該要好細微，瞓落床可以摸吓（乳房）！（老公梁朝偉呢？）佢仲健康過我，我哋最唔健康嗜好就係飲酒，其實飲葡萄酒都健康嘅！」
自稱速遞公司職員
提到電話騙案日益猖獗，嘉玲自爆早前與母親分別收到該類電話，有一名報稱是速遞公司職員的騙徒，指她由上海寄了不合法的護照到內地其他城市：「香港同內地市民都要好留意，唔好隨便相信人哋同你講好求其，或者好嚴重嘅嘢！我一聽就覺得唔可能，就cut咗佢線，佢之後再打番畀我問點解cut佢線，如果係政府同正規公司係唔會問點解cut佢線，我就同佢講再打嚟就報警！（對方知道你身份嗎？）冇去追究呢樣嘢！都冇問點解有我電話，因為寄信時真係會有你電話，一定知道你資料。」
而其母親則被一名報稱是公安騙徒，指她欠了近五千元電話費，要立即交款到某戶口：「我阿媽年紀大，一聽到就會好驚，佢哋習慣用法律令人好驚好緊張，同埋詐騙時間一定係下晝兩點至五點，得番良家婦女喺屋企時就最容易呃！（媽咪最後有冇受騙？）好彩我喺度！」
羅馬展示女神魅力
另外，嘉玲與前法國第一夫人布魯尼（Carla Bruni）日前為珠寶品牌BVLGARI遠赴羅馬拍攝，兩位東西方女神各具魅力，而嘉玲透露向來有收藏珠寶的習慣，當碰到合適機緣，也想嘗試參與珠寶設計工作。
文：名人組