楊千嬅濃妝：囝囝堅驚避開我

楊千嬅前晚在澳門舉行巡迴演唱會，獲老公丁子高、囝囝Torres、父母和奶奶到場支持。千嬅表演期間多次感激粉絲多年來支持，是支撐她一路走下去的動力。她謂：「有啲歌帶畀我眼淚，我好感性，因為我係水瓶座，原來失戀係好痛苦！我經歷過，係好震撼好痛，回頭望會有更多智慧，學習到自己缺點。世畀上冇話有『最愛』，喺啱嘅時間遇到啱嘅人就係『最』。」

讚王菀之有才華

當晚千嬅請來王菀之（Ivana）合唱《月亮說》，大讚對方有才華外，更透露《月亮說》原本是Ivana寫給自己，卻因唱片公司合約問題未有錄製，很遺憾失去這首歌。致謝環節時，千嬅感謝媽媽在她出埠演出時幫忙照顧囝囝，今次終讓媽媽看到自己演出，直言家人給予自己很大力量。

丁子高偕兒子及千嬅父母到場睇騷。	王菀之被千嬅激讚有才華。	千嬅化濃妝演出，反而嚇親囝囝。

感激老公陪練跑

千嬅完騷後受訪，透露找囝囝時嚇親對方：「我嗌BB，佢走開。（因為化咗妝？）有冇差咁遠？佢堅驚咁避開我。（屋企都係咁嘅樣？）屋企都咁要睇醫生！可能佢未消化，見到咁多嘢。」她又表示開騷前一日老公帶了囝囝到處吃喝玩樂，猶如拍攝內地節目《爸爸去哪兒》。提到父母及奶奶現身支持，她笑言：「好似（農曆新年）年初一咁齊，係拜年組合。我媽咪好鍾意睇，但成日冇機會，出埠佢就要睇住囝囝。（你生完，媽咪就冇再睇過？）有睇香港，第一次開tour想佢感染氣氛，生完係到另一節奏，年紀愈大，唱一場少一場。」她笑指老公見自己搏命運動減肥都有勸別太辛苦，但覺得歌手表演要在最佳狀態才可上台。雖然有時老公邊吃美食邊勸自己，但仍感謝對方陪她練跑。

文：音樂組